ԵՐԵՎԱՆ, 29 հունվարի./Նովոստի–Արմենիա/. Հայաստանցիները հունվարի 31–ի գիշերը կարող են մասամբ տեսնել «արյունոտ» գերլուսին, «Նովոստի–Արմենիա» գործակալությանը տեղեկացրեց Բյուրականի աստղադիտարանի տնօրեն Արեգ Միքայելյանը։
Կարմիր գերլուսինն աստղագիտական բացառիկ երևույթ է, որը տեղի է ունենում, երբ Լուսինը և Երկիր մոլորակն առավելագույնս մոտ են իրար։
Միքայելյանի խոսքով, այս բացառիկ երևույթին հնարավոր կլինի հետևել հունվարի 31– ի գիշերը։
Նա նշեց, որ լիալուսնի ժամանակ տեղի կունենա ևս մեկ երևույթ` լուսնի խավարում, երբ Երկիր մոլորակը կհայտնվի Արեգակի և Լուսնի միջև։
«Ցավոք, Հայաստանից այն կերևա ոչ այնքան լավ, սակայն մենք մասամբ կտեսնենք», – ասաց Միքայելյանը։
Նրա խոսքով, Լուսինն անվանում են «արյունոտ», քանի որ այդ պահին միաժամանակ տեղի է ունենում մի քանի երևույթ։
«Երբ Լուսինը Երկիր մոլորակի շուրջ պտտվելիս հայտնվում է սովորականից ավելի մոտ հեռավորության վրա, նրա չափերը փոքր–ինչ փոխվում են` մոտ 15%–ով, ինչն այդքան էլ շատ չէ, սակայն զգալի է։ Այն երևույթը, երբ Լուսինը փոքր–ինչ մեծ է և սովորականից ավելի պայծառ, անվանում են գերլուսին», – ընդգծեց Միքայելյանը։
Նա նշեց, որ խավարման ժամանակ Լուսինը, չնայած որ հայտնվում է Երկիր մոլորակի ստվերում, շարունակում է փոքր–ինչ լույս արձակել, և այն, որպես կանոն, ստանում է կարմրավուն երանգ։
«Այդ իսկ պատճառով այս երևույթը երբեմն անվանում են «արյունոտ Լուսին», ինչը պայմանական անվանում է։ Երբ այս երևույթը համընկնում է գերլուսնի հետ, այն կոչվում է «արյունոտ» գերլուսին, ինչը հազվագյուտ երևույթ է, քանի որ միշտ չէ, որ գերլուսինը համընկնում է խավարման հետ», – ասաց Միքայելյանն ու հավելեց, որ այս երևույթն ամենից լավ կերևա Եվրոպայի հյուսիսային մասում, Ավստրալիայում և Նոր Զելանդիայում։–0–
