Ե՞րբ կսկսվեն մարզպետերի կադրային փոփոխությունները

ԵՐԵՎԱՆ, 1 հոկտեմբերի. /Նովոստի–Արմենիա/. Մարզպետերի հետ կապված կադրային փոփոխությունները կսկսվեն եկող շաբաթվա սկզբից, գրում է «Ժողովուրդը»։

Ենթադրվում է, որ արդեն գալիք հինգշաբթի կայանալիք կառավարության նիստում մարզպետերի պաշտոնանկություններ և նշանակումներ տեղի կունենան:

Թերթի տեղեկություններով՝ այս գործընթացի ձգձգումը պայմանավորված է վաղը Հայաստանի մարզերում կայանալիք տեղական ինքնակառավարման մարմինների ընտրություններով:

«Բանն այն է, որ իշխանական վերնախավում որոշվել է, որ մինչ այդ մարզպետերի պաշտոնանկության հարցերը կարիք չկա քննարկել, քանի որ պոտենցիալ պաշտոնանկ արվող մարզպետերն իրենց մարզերում կարող են ՀՀԿ թեկնածուների ընտրությունները տապալել», – գրում են հոդվածի հեղինակները։

Թերթի տեղեկություններով՝ Կարեն Կարապետյանին, որպես վարչապետի թեկնածու ներկայացնելիս, Սերժ Սարգսյանը իշխանական վերնախավին զգուշացրել է, որ բոլոր հարցերում, այդ թվում՝ կադրային, նա է լինելու որոշում կայացնողը:–0–