ԵՐԵՎԱՆ, 5 ապրիլի./Նովոստի–Արմենիա/. Ամերիաբանկը գտնվում է թվային փոխակերպման ճանապարհին։ Այս մասին լրագրողներին հայտնեց Ամերիաբանկի Ինովացիաների և թվայնացման գծով տնօրեն Արտյոմ Շամցյանը Երևանում կայացած Doing Digital Forum–ի շրջանակում։
Նրա խոսքով, Doing Digital Forum–ը սեփական փորձով կիսվելու հնարավորություն է։
«Ամերիաբանկը անցել է փոխակերպման երեք փուլ` կոնսալտինգային բանկ, կորպորատիվ բանկ, թվային տեխնոլոգիաների վրա հիմնված բանկ։ Մենք անցել ենք այս փոփոխությունները, ներդրել համապատասխան բոլոր թվային լուծումները` միջազգային չափորոշիչներին և միտումներին համապատասխան», – ընդգծեց նա։
Ամերիաբանկի տաղանդների և ծառայությունների գծով տնօրեն Արմինե Ղազարյանն իր ողջույնի խոսքում նշեց, որ թվային փոխակերպման գործընթացում շարժիչ ուժը մարդիկ են։
«Մենք ունենք մարդկային հզոր կապիտալ, ինչն ամուր հենք է, որպեսզի Հայաստանը դառնա տեխնոլոգիաների և նորարարությունների տարածաշրջանային նոր հանգրվան։ Իսկ ի՞նչն է տանելու մեզ դեպի այդ հանգրվանը։ Տեխնոլոգիանե՞րը: Ո՛չ, տեխնոլոգիան բավարար չէ։ Պատասխանն է` մարդիկ», – ասաց նա։
SPRING PR ընկերության համահիմնադիր Տաթևիկ Սիմոնյանն իր հերթին նշեց, որ Doing Digital հարթակը ստեղծվել է նպաստելու համար ակտիվ քննարկումների ծավալմանը թվային փոխակերպման տիրույթում առկա միտումների, բիզնես զարգացումների, հնարավորությունների և մարտահրավերների վերաբերյալ, որոնց այսօր առերեսվում են թվային փոխակերպման գործընթացի բոլոր դերակատարները։
«Ֆորումի նպատակն է միավորել էկոհամակարգերը և աշխարհին ներկայացնել Հայաստանը` որպես նորարարությունների, նորագույն տեխնոլոգիաների և թվային փոխակերպման հաբ։ Հիմա ճիշտ ժամանակն է խոսելու համար այն աշխատանքի և փորձի մասին, որն ունի ընկերությունը թվային փոխակերպման, ինչպես նաև խնդիրները գիտակցելու ճանապարհին», – ասաց նա։
Սիմոնյանը նշեց, որ ֆորումը նախատեսվում է անցկացնել ամեն տարի, ինչպես նաև տարվա ընթացքում հարթակ տրամադրել օտարերկրյա հյուրերին և տեղի մասնագետներին փորձի փոխանակման համար։
Ամերիաբանկը ապրիլի 5–ին անցկացված The Doing Digital Forum–ի համակազմակերպիչն է, կազմակերպիչն է SPRING PR ընկերությունը։ Միջոցառման նպատակն է համախմբել ոլորտի առաջատարներին՝ բացահայտելու թվային փոխակերպման նորագույն միտումներն ու հաղորդակցվելու լավագույն փորձառությանը։ DDF-ի խոսնակների շարքում են նաև Ռուբեն Մուրադյանը (Hexens), Վախթանգ Աբրահամյանը (Fastex), Վաչիկ Գևորգյանը (Apricot Capital), Տիգրան Սիմոնյանը (Revytech), Արարատ Մկրտչյանը (Beta Financial Technologies), Մաքսիմ Միխալյովը (ICDT Global), Սյուզաննա Շամախյանը (FAST):
Ծանոթացեք լուրերին առաջինն ու քննարկեք դրանք մեր Telegram-յան ալիքում
