Դեպքը 2013 թվականից հետո տեղի ունենալ չէր կարող. ոստիկանությունը` անգղերի որսի մասին
ԵՐԵՎԱՆ, 5 հոկտեմբերի. /Նովոստի–Արմենիա/. Ոստիկանությունը հանդես է եկել հայտարարությամբ` կապված Հայաստանում սպիտակագլուխ անգղերի որսի հետ։
Նշենք, որ նախօրեին Econews.am լրատվական կայքում տեղադրվել էր հոդված, որն ահազանգում էր Կարմիր գրքում գրանցված սպիտակագլուխ անգղերի որսի մասին։ Աղբյուրը նշում է, որ սպիտակագլուխ անգղը վտանգված տեսակ է: Գրանցված է նախկին ԽՍՀՄ և Ռուսաստանի Կարմիր գրքերում: Տեսակն ընդգրկված է ԲՊՄՄ Կարմիր ցուցակում (ver. 3.1) «Least Concern» կարգավիճակով: ԲՊՄՄ Կարմիր ցուցակի չափորոշիչներով գնահատվում է որպես «Խոցելի»` VU D1: Ընդգրկված է նաև Հայաստանի Կարմիր գրքում: ՀՀ-ում տարածված է խոշոր ժայռագոյացություններով լեռնազանգվածներում՝ Սյունիքի մարզ, Տավուշի մարզ, Լոռու մարզ:
ՀՀ ոստիկանության հաղորդագրության համաձայն, հոկտեմբերի 4-ին «Econews.am» լրատվական կայքում տեղադրվել էր «Ահազանգ. որսացել են Կարմիր գրքում գրանցված սպիտակագլուխ անգղեր» հոդվածը, որտեղ առկա էին նաև որս կատարողների նկարներ՝ անգղերը ձեռքներին:
«Պարզվել է նշված երեք անձանցից երկուսի ինքնությունը՝ Ա. Մկրտչյան և Յ. Պողոսյան: Ձեռնարկվում են միջոցառումներ՝ երրորդ անձի ինքնությունը պարզելու և հայտնաբերելու ուղղությամբ: Ստուգումներով պարզվել է նաև, որ նկարներում երևացող մեքենայի համարանիշը 2013 թ.–ի օգոստոսի 2–ին հանձնվել է, և այլ տրանսպորտային միջոցի չի տրամադրվել, իսկ նկարում երևացող ավտոմեքենայի վրա տեղադրվել է հաշվառման այլ համարանիշ», – նշվում է ոստիկանության տարածած հաղորդագրության մեջ։
«Հետևաբար դեպքը 2013 թվականից հետո տեղի ունենալ չէր կարող:
Հանգամանքները պարզվում են: Ոստիկանության Արմավիրի բաժնում նախապատրաստվում են նյութեր», – հայտնում է գերատեսչությունը։
ՀՀ վարչապետի խորհրդական Նարեկ Մալյանն իր հերթին Facebook–յան իր էջում հաղորդել է, որ պատկան մարմինները զբաղվում են միջադեպի բացահայտմամբ` օրենքի ամբողջ խստությամբ։–0–
