ԵՐԵՎԱՆ, 22 ապրիլի. /Նովոստի Արմենիա/. Երևանյան ակցիայի մասնակիցները փակել են Արշակունյաց պողոտան ու շարժվում են դեպի Հանրապետության հրապարակ:
Այսօր առավոտ «Մարիոթ» հյուրանոցում «Ելք» ընդդիմադիր կուսակցուցյան ղեկավար Նիկոլ Փաշինյանի հետ կայացած հանդիպմանը ՀՀ վարչապետ Սերժ Սարգսյանը շանտաժ է անվանել ընդդիմության գործողությունները: Նա զգուշացրել է, որ այդ գործողությունների շարունակության դեպքում ամբողջ պատասխանատվությունը ընկնելու է ընդդիմության վրա: Սերժ Սարգսյանի գնալուց հետո Փաշինյանը նշել է, որ ակցիաներն ամբողջ հանրապետությունում կշարունակվեն կրկնակի ծավալով: Ավելի ուշ Արցախի պողոտայում անցկացվող երթի ժամանակ Նիկոլ Փաշինյանը, ինչպես նաև «Քաղաքացիական պայմանագիր» կուսակցության վարչության անդամ Սասուն Միքայելյանը բերման են ենթարկվել: Ոստիկանությունը նաև զանգվածային բերման է ենթարկում ցուցարարներին:
Ինչպես հայտնում է «Նովոստի Արմենիա» գործակալության թղթակիցը, Հանրապետության հրապարակում են ոստիկանական լրացուցիչ ուժերը:
Ինչպես նշեց Երևանի փոխոստիկանապետ Վալերի Օսիպյանը, ոստիկանությունը դեմ է ուժի կիրառմանը: Հանրապետության հրապարակ ժամանել են լրացուցիչ ոստիկանական ուժեր, նրանք շրջապատել են կառավարության շենքն ու դուրս են մղել ցուցարարներին:
Ցուցարարները վանկարկում են «Նիկոլ–Նիկոլ»: Փաշինյանի կինը երթի սկզբում է, հանրահավաքի մասնակիցներին ուղեկցում են մի քանի հոգևորականներ, ովքեր կոչ են անում մասնակիցներին չցուցադրել ագրեսիա:
Ցուցարարների երկրորդ մասը շարունակում է մնալ Արցախի պողոտայում, որտեղից նրանք նախատեսում են երթ անցկացնել մայրաքաղաքի բոլոր փողոցներով:
Ապրիլի 13–ին «Ելք» ընդդիմադիր խմբակցության ղեկավար, «Քաղաքացիական պայմանագիր» կուսակցության ղեկավար Նիկոլ Փաշինյանը Երևանում անցկացնում է շուրջօրյա հանրահավաքներ Սերժ Սարգսյանի վարչապետության դեմ։ Ապրիլի 16–ից հանրահավաքները վերածվեցին քաղաքացիական անհնազանդության համաքաղաքային ակցիաների։ Բողոքներն ուղեկցվում են բախումներով ցուցարարների և իրավապահների միջև, մասնավորապես, Բաղրամյան պողոտայում, փողոցների և առանցքային մայրուղիների, ինչպես նաև պետական հաստատությունների շենքերի արգելափակմամբ։ Ապրիլի 17–ին կազմակերպված հանրահավաքի ժամանակ Փաշինյանը հայտարարեց «թավշյա» հեղափոխության մասին։–0–
