Ցուցարարներին չհաջողվեց վրան տեղադրել Ազատության հրապարակում
![Ցուցարարներին չհաջողվեց վրան տեղադրել Ազատության հրապարակում Ցուցարարներին չհաջողվեց վրան տեղադրել Ազատության հրապարակում](/upload/iblock/0bd/3wbu0zxfbvrr19bpl6v0wf6neeh3a0gu.jpg)
ԵՐԵՎԱՆ, 4 դեկտեմբերի. /Նովոստի–Արմենիա/. Ոստիկանությունը թույլ չտվեց «Նոր Հայաստան» ընդդիմադիր ճակատի ակտիվիստներին վրան տեղադրել Ազատության հրապարակում, որտեղ դեկտեմբերի 1–ից անցկացվում է բողոքի շուրջօրյա անժամկետ ակցիան` ընդդեմ սահմանադրական բարեփոխումների։
Ինչպես հաղորդում է «Նովոստի–Արմենիա» գործակալության թղթակիցը, ոստիկանության աշխատակիցների և ցուցարարների միջև տեղի ունեցավ քաշքշուկ։
«Նոր Հայաստան» շարժման առաջնորդներից մեկը` Ժիրայր Սեֆիլյանը, հայտարարեց, որ հանրաքվեի օրը` դեկտեմբերի 6–ին, ակտիվիստներն անպայման վրաններ կտեղադրեն հրապարակում։
Ավելի վաղ «Ժառանգություն» ընդդիմադիր կուսակցության առաջնորդ Րաֆֆի Հովհաննիսյանը հաստատեց, որ շաբաթ օրը` դեկտեմբերի 6–ին, Ազատության հրապարակում տեղի կունենա հերթական հանրահավաք և լուռ քայլերթ։
Նա տեղեկացրեց, որ ընդդիմադիր շարժման ղեկավարները պատրաստվում են Հայաստանում հանդիպել օտարերկրյա մի շարք դեսպանների հետ` արտաքին քաղաքականությանը վերաբերող հարցերի շուրջ իրենց միասնական դիրքորոշումը ներկայացնելու համար։
Դեկտեմբերի 1–ի երեկոյան մեկնարկեց «Նոր Հայաստան» շարժման հանրահավաքների շարքն` ընդդեմ սահմանադրական բարեփոխումների։ Ցուցարարները հայտարարեցին, որ Ազատության հրապարակում կազմակերպում են անժամկետ նստացույց։
Սահմանադրական բարեփոխումների հանրաքվեն կանցկացվի դեկտեմբերի 6–ին։ Բարեփոխումներով նախատեսվում է անցում կատարել խորհրդարանական իշխանավարման։–0–