Աստղային «հրավառություն». Հայաստանի բնակիչները կտեսնեն ամենապայծառ աստղաթափը

ԵՐԵՎԱՆ, 13 դեկտեմբերի. /Նովոստի–Արմենիա/. Հայաստանի բնակիչները դեկտեմբերի 13–14–ը կարող են դառնալ այս տարվա ամենապայծառ ասուպային անձրևի ականատեսը, «Նովոստի–Արմենիա» գործակալությանն ասաց Բյուրականի աստղադիտարանի տնօրեն Արեգ Միքայելյանը։

Ավելի վաղ NASA–ն հաղորդել էր, որ դեկտեմբերին երկրագնդի բնակիչները կտեսնեն այս տարվա վերջին աստղաթափը` Գեմինիդայի հոսքը։ Աստղաթափն առավել ինտենսիվ կլինի դեկտեմբերի 13–ի լույս 14–ի գիշերը։

«Ասուպային հոսքին հնարավոր կլինի հետևել Հայաստանի բոլոր կետերից։ Այս երևույթն ամենից լավ կերևա արևելյան հատվածից։ Գեմինիդայի հոսքը կապված է Երկվորյակների համաստեղության հետ, և գտնելով այդ համաստեղությունը երկնքում` մարդիկ կկարողանան այդ հատվածում տեսնել մեծ թվով ասուպներ», – ասաց Միքայելյանը։

Նա ընդգծեց, որ ասուպային հոսքն ամենից լավ կերևա կեսգիշերից հետո։

«Հնարավոր կլինի տեսնել ժամում մինչև 60 ասուպ։ Այն կլինի այս տարվա ամենապայծառ ասուպային անձրևը Հյուսիսային երկնքում», – նշեց Միքայելյանը։

Նա ընդգծեց, որ ասուպային անձրևը հնարավոր կլինի տեսնել նաև դեկտեմբերի 14–ից հետո։ «Այս երևույթը սովորաբար տևում է մի քանի օր», – պարզաբանեց Բյուրականի աստղադիտարանի տնօրենը։–0–