ԵՐԵՎԱՆ, 18 սեպտեմբերի. /Նովոստի-Արմենիա/. ՀՀ նորանշանակ վարչապետ Կարեն Կարապետյանը ներպալատական քննարկումների ժամանակ խոստովանել է, որ մտադիր է կառավարության կազմը 99 տոկոսով փոփոխությունների ենթարկել, հաղորդում է «Ժողովուրդ» օրաթերթը։
Սակայն, պարբերականի հաղորդմամբ, Կարապետյանը չի կարողանում «արժանի փոխարինողներ» գտնել։
«Ու սա է պատճառը, որ հաջորդ շաբաթ նախարարական առաջին նշանակումները երբ արվեն, առաջնահերթ կվերանշանակվեն դաշնակցական նախարարները՝ Էկոնոմիկայի նախարարի պաշտոնում՝ Արծվիկ Մինասյանը, ՀՀ կրթության և գիտության նախարարի պաշտոնում՝ Լևոև Մկրտչյանը և Տարածքային կառավարման նախարարի պաշտոնում՝ Դավիթ Լոքյանը», - նշվում է հաղորդագրության մեջ։
«Հայկական ժամանակ» թերթը ներկայացնում է իր տարբերակը, թե ինչու Կարապետյանը չի սկսել ձևավորել կառավարությունն այս շաբաթ, այլ հետաձգել է դա մինչ հաջորդ շաբաթ: «Այս գործընթացին մի փոքր ոչ պաշտոնական միջոցառում է խանգարել՝ տրանսպորտի և կապի նախարար Գագիկ Բեգլարյանի որդու հարսանիքը, որը տեղի է ունենալու այս հանգստյան օրերին։ Բանը նրանում է, որ հարսանիքին հրավիրված որոշ նախարարներ, հնարավոր է, չվերանշանակվեն: Նույնը կարող է վերաբերել նաև Գագիկ Բեգլարյանին», - գրում է պարբերականը: -0-
