ԵՐԵՎԱՆ, 2 ապրիլի./Նովոստի–Արմենիա/. Ընդդիմադիր ՀԱԿ–ը հանդես է եկել հայտարարությամբ, որում հայտարարել է, որ պատրաստ է համախմբվել իշխանությունների հետ` համընդհանուր արտաքին սպառնալիքի ֆոնին, նշվում է շաբաթ օրը ՀԱԿ–ի տարածած հայտարարության մեջ։
Ապրիլի 1-ի լույս 2-ի գիշերը ղարաբաղա–ադրբեջանական շփման գծի հարավային, հարավարևելյան և հյուսիսարևելյան ուղղություններով հակառակորդը ձեռնարկել է բացահայտ հարձակվողական գործողություններ`հրետանիով, զրահապատ տրանսպորտային միջոցներով և ավիացիայով: ԼՂՀ պաշտպանության բանակի ստորաբաժանումները մարտեր են տանում առաջնային գծի բոլոր ուղղություններով` հակառակորդին կենդանի ուժի և ռազմական տեխնիկայի զգալի կորուստներ պատճառելով։ Մասնավորապես, ԼՂՀ պաշտպանության բանակի օպերատիվ տվյալներով, մարտական գործողությունների ընթացքում ոչնչացվել են հակառակորդի երկու ուղղաթիռ, երեք տանկ և երկու անօդաչու թռչող սարք։
Ինչպես նշվում է հայտարարության մեջ, Ադրբեջանի նախահարձակ գործողությունների հետեւանքով իրավիճակը սրվել է Ղարաբաղյան հակամարտության ողջ սահմանային գծում՝ ուղեկցվելով ծանր տեխնիկայի օգտագործմամբ և երկուստեք մարդկային կորուստներով։
ՀԱԿ–ի հայտարարության մեջ նաև նշվում է, որ տևական, սակայն, միայն զինադադարի վրա հենված լինելով՝ անկայուն խաղաղությունը, այս անգամ ավելի լայնամասշտաբ ռազմական գործողություններով, կանգնած է խզման վտանգի առջև։
Ադրբեջանն ապատեղեկատվություն է տարածում այն մասին, որ իբր ադրբեջանական ԶՈւ–ն ԼՂ տարածքում տարբեր բնակավայրեր է գրավել. ՀՀ ՊՆ>>
«Հայ ազգային կոնգրեսը խստորեն դատապարտում է Ադրբեջանի՝ իրավիճակը սրելու գործողությունները և հայտարարում, որ անկախ գործող իշխանության հետ ներքաղաքական հարցերում մեր ունեցած հակասություններից և տարաձայնություններից, Հայ Ազգային Կոնգրեսը, հավատարիմ իր՝ ի սկզբանե և ոչ մեկ անգամ հռչակած սկզբունքի, արտաքին վտանգի դեպքում կանգնած է լինելու երկրի ներքաղաքական կայունության պահպանման և անվտանգության պաշտպանության դիրքերում», – նշվում է հայտարարության մեջ։
Փաստաթղթի մեջ նաև նշվում է, որ Հայաստանի և Լեռնային Ղարաբաղի ժողովուրդը, բանակը պետք է վստահ լինեն, որ արտաքին ամեն կարգի ագրեսիայի դեմ միավորվելու է Հայաստանի ողջ քաղաքական և քաղաքացիական դաշտը։
«Ադրբեջանի համապատասխան շրջանակները, նույնպես, սեփական փորձից, կարող են վստահ լինել, որ ներքաղաքական որեւէ խնդիր չի կարող նշանակել հայ ժողովրդի բաժանում կամ պառակտում, եւ ագրեսիա իրականացնելիս հաշվարկներ անել դրա վրա», – նշվում է ՀԱԿ–ի հայտարարության մեջ։-0-
