ԵՐԵՎԱՆ, 23 ապրիլի./Նովոստի–Արմենիա/. Ավելի քան 600 ՏՏ մասնագետներ տարբեր երկրներից հավաքվել են Հայաստանում առաջին միջազգային Armenian Blockchain Forum–ի շրջանակում։
Armenian Blockchain Forum–ը տեղեկատվական–կրթական հարթակ է, որը միավորում է ձեռներեցների, ընկերությունների ու փորձագետների գործնական գիտելիքները, այն ուղղված է բարենպաստ պայմանների ստեղծման վրա Հայաստանում տեխնոլոգիական ընկերությունների զարգացման համար։
«Հայկական բլոկչեյն համաժողովը միասնական հարթակ է, որտեղ համաժողովի մասնակիցները հնարավորություն կունենան իրականացնել փորձի փոխանակում, քննարկել տեխնիկական և իրավական հարցերն ու այս բնագավառում հնարավոր համագործակցության ուղղությունները, ինչն էապես կարևորվում է երկրում թվային տնտեսության ձևավորման և զարգացման տեսանկյունից», – համաժողովի ընթացքում ասել է ՀՀ տնտեսական զարգացման և ներդրումների նախարար Սուրեն Կարայանը։
Նա նշել է, որ ապակենտրոնացված և տեղաբաշխված ռեեստրների տեխնոլոգիաներն օրեցօր ավելի արդիական են դառնում և լայն կիրառություն են ստանում տնտեսական գործունեության տարբեր բնագավառներում։
Նրա խոսքով, ապակենտրոնացված տեխնոլոգիաները թույլ են տալիս գործունեություն իրականացնել և մատուցել ծառայություններ առանց միջնորդների մասնակցության` այսպիսով բարձրացնելով գործընթացի թափանցիկությունը։
Միջազգային պրակտիկայում առանձնացվում են բլոկչեյն տեխնոլոգիաների կիրառումն ու զարգացումը խոչընդոտող ռիսկերի 2 հիմնական ուղղություններ, որոնցից առաջինն այս բնագավառում գիտելիքների անբավարարությունն է, իսկ երկրորդը` անվտանգությունը: Համաժողովի մասնակիցները հնարավորություն կունենան քննարկելու այս կարևոր հարցերը և ներկայացնելու հնարավոր լուծումները:
Առաջին անգամ Երևանում հավաքվել են բլոկչեյն տեխնոլոգիների և արհեստական ինտելեկտի ոլորտի ավելի քան 600 մասնագետներ և փորձագետներ աշխարհի տարբեր երկրներից` Հայաստան, ԱՄՆ, Իռլանդիա, Չինաստան, Շվեյցարիա, Ուկրաինա, Ռուսաստան, Վրաստան, Կանադա, Հոնգկոնգ և այլն:
Ֆորումի ծրագիրը ներառում է 3 աշխատանքային սեկցիաներ, որոնք նվիրված են բլոկչեյն ինդուստրիայի ապագայի, աշխարհում այս տեխնոլոգիայի ունեցած դերի, կրիպտարժույթներում ներդրումների և ICO նախագծերի վերաբերյալ: Անցկացվել են նաև 12 կրթական վարպետության դասեր և Roadshow, որտեղ 15 ստարտափ թիմեր հնարավորություն են ստացել իրենց նախագծերը ներկայացնելու աշխարհի 20 երկրներից ժամանած պրոֆեսիանալ ներդրողներին, որոնց թվում են ասիական 3 թոփ ներդրողները: Ֆորումի մասնակիցների գումարային կապիտալը գերազանցել է 10 մլրդ ԱՄՆ դոլարը:
Համաժողովի կարևորագույն միջոցառումներից մեկը դարձել է IBM ընկերության հետ համատեղ Blockchain Open University-ի (Բլոկչեյնի բաց համալսարան) ստեղծման և զարգացման մասին հուշագրի ստորագրումը:–0–
