Երևանի փողոցներից մեկում նռնակ է վնասազերծվել

ԵՐԵՎԱՆ, 4 օգոստոսի./Նովոստի–Արմենիա/. Երևանի Որմնադիրների փողոցում այսօր նռնակ է հայտնաբերվել, հաղորդում է ՀՀ ԱԻՆ փրկարար ծառայությունը։

Մասնավորապես, օգոստոսի 4-ին, ժամը 13.24-ին տեղեկատվություն է ստացվել, որ Երևանի Որմնադիրների փողոցում հայտնաբերվել է նռնակ և անհրաժեշտ է փրկարարների օգնությունը։

Դեպքի վայր է մեկնել ճգնաժամային կառավարման ազգային կենտրոնի օպերատիվ խումբը և մեկ մարտական հաշվարկ:

«Պարզվել է, որ Գլինկայի և Որմնադիրներ փողոցների խաչմերուկի մոտակայքում հայտնաբերվել է «РГД-5» տեսակի ձեռքի մարտական նռնակ, որի վնասազերծման համար անհրաժեշտ է ՊՆ ինժեներասակրավորական խումբը», – նշվում է հաղորդագրության մեջ։

Դեպքի վայր է մեկնել ՀՀ ՊՆ ինժեներասակրավորական խումբը, որը վնասազերծել է «РГД-5» տեսակի ձեռքի մարտական նռնակը:–0–