Վիգեն Սարգսյանն ընդդեմ Կարեն Կարապետյանի. ներիշխանական խուլ պայքար
ԵՐԵՎԱՆ, 15 մարտի. /Նովոստի–Արմենիա/. Երեկ ՀՀ պաշտպանության նախարարությունը լրատվամիջոցներից մեկի հարցմանն ի պատասխան՝ պաշտոնական գրությամբ տեղեկացրել է, որ անորակ դիզվառելիքի պատճառով ռազմական տեխնիկայի խափանումներ, ներառյալ 2016 թվականին չեն արձանագրվել, գրում է «Ժողովուրդը»։
«Ասել է, թե ՀՀԿ ցուցակը գլխավորող Վիգեն Սարգսյանի ղեկավարած գերատեսչությունը հերքել է վարչապետ Կարեն Կարապետյանի՝ վերջերս ԱԺ ամբիոնից արած հայտարարությունը, թե ապրիլյան պատերազմի օրերին տեխնիկան չի աշխատել անորակ վառելանյութի պատճառով», – նշում են հոդվածի հեղինակները։
Հատկանշական է, որ վարչապետն իր այս հայտարարությունը կրկնել էր նաև նախօրեին՝ Ավանում նախընտրական հանդիպման ժամանակ:
«Այո՛, Հայաստանում նախկինում մուտք էր գործում անորակ, նույնիսկ ոչ թե դիզվառելիք, այլ վառելիք: Այն դիզվառելիքի հետ խառնվելու դեպքում տեխնիկան չէր աշխատեցնում», – մասնավորապես նշել է Կարապետյանը։
ՊՆ հերքումը հաջորդել էր այդ հայտարարությանը:
Երեկ «Ժողովուրդ» օրաթերթի դիտարկմանը, թե ՊՆ-ն հերքում է իր հայտարարությունները, Կարեն Կարապետյանն ասել է. «Դե, հերքում են, դուք էլ նայեք իմ պատասխանը»:
Փաստորեն, ներիշխանական խուլ պայքարն, այնուամենայնիվ, ընթանում է, նշում է թերթը։–0–
