ԵՐԵՎԱՆ, 17 ապրիլի./Նովոստի–Արմենիա/. ՀՀ վարչապետ Սերժ Սարգսյանն առաջարկել է «Ելք» խմբակցության ղեկավար Նիկոլ Փաշինյանին փողոցից վերադառնալ խորհրդարան։
Փաշինյանն ապրիլի 13–ից Ֆրանսիայի հրապարակում շուրջօրյա հանրահավաքներ է անցկացնում Սերժ Սարգսյանի վարչապետության դեմ։ Հանրահավաքներն ապրիլի 16–ից վերածվել են քաղաքացիական անհնազանդության համաքաղաքային ակցիաների։ Բողոքներն ուղեկցվում են բախումներով ցուցարարների և ոստիկանների միջև, ինչի հետևանքով վնասվածք է ստացել 46 մարդ, այդ թվում` Նիկոլ Փաշինյանն ու 6 ոստիկան։ Երեքշաբթի Փաշինյանը հայտարարեց «թավշյա» հեղափոխության մեկնարկի մասին և իր համախոհների հետ արգելափակեց պետական գերատեսչությունների շենքերի մեծ մասը։
Ապրիլի 17–ին ՀՀ ԱԺ–ն 77 «կողմ» և 17 «դեմ» ձայներով Սերժ Սարգսյանին ընտրեց ՀՀ վարչապետի պաշտոնում։
«Գործադրեք բոլոր ջանքերը ձեր գործընկերոջը (Նիկոլ Փաշինյանին, խմբգր.) փողոցից խորհրդարան վերադարձնելու համար, դա կլինի ձեր մեծագույն վաստակը, քանի որ երբեք որևէ ժամանակ անձամբ ես, մեր քաղաքական ուժն արյան ծարավ չի ունեցել։ Մենք արյուն շատ ենք տեսել, բայց նույնիսկ մեր թշնամու արյան ծարավ ես երբեք չեմ ունեցել», – ասաց Սարգսյանը։
Նրա խոսքով, «...եթե ժողովուրդը լիներ օրինազանց, ապա փողոցներում միլիոնավոր մարդիկ պետք է լինեին»։
«Դուք բոլորից լավ գիտեք, թե քանի մարդ է մասնակցում այս ցույցերին։ Ինչպես ասացի, սա ընդամենը խորհուրդ է, ոչ պարտադրանք, ոչ դատավճիռ և ոչ էլ մեղադրանք։ Հարկավոր է վերադառնալ կառուցողական դաշտ, սա է պահանջում ժողովուրդն ու մեր ապագան», – ասաց Սարգսյանը։
Երևանի փողոցներում հանրահավաք անցկացնող Նիկոլ Փաշինյանը, Սերժ Սարգսյանի առաջարկին ի պատասխան, նշել է, որ ցուցարարների բոլոր գործողությունները գտնվել և գտնվում են քաղաքացիական անհնազանդության գործընթացի շրջանակում։
«Արդեն նշանակություն չունի, թե որքան պատգամավոր է դեմ քվեարկել։ Հիմա արդեն ակնհայտ է, որ ՀՀԿ–ն և Սերժ Սարգսյանը չունեն որևէ աջակցություն բնակչության կողմից, և նրանք Հայաստանը ղեկավարելու որևէ հիմք չունեն։ Նրանք չպետք է ղեկավարեն, և բնակչությունը պետք է քաղաքացիական անհնազանդության գործողություններ իրականացնի», – ասաց Փաշինյանը։–0–
