ԵՐԵՎԱՆ, 23 մարտի. /Նովոստի-Արմենիա/. Երեկվանից Ազգային անվտանգության ծառայությունում գտնվող ԼՂՀ պաշտպանության բանակի նախկին հրամանատար Սամվել Բաբայանը չի ընդունում իրեն առաջադրված մեղադրանքը, հայտնում է tert.am-ը` հղում անելով Արցախի պաշտպանության նախկին նախարարի փաստաբան Ավետիս Քալաշյանին, ով այսօր ներկա է եղել Սամվել Բաբայանի հարցաքննությանը, որն արդեն ավարտվել է:
Մարտի 22-ին Բաբայանը ձերբակալվել է մաքսանենգ եղանակով Հայաստանի Հանրապետություն «Իգլա» տեսակի զենիթա-հրթիռային համալիր տեղափոխելու փաստի առթիվ հարուցված քրեական գործի շրջանակում։
Загружается новость ... "Лево"
Պարբերականի հաղորդմամբ, փաստաբանը ասել է, որ կարճ հարցաքննություն է տեղի ունեցել:
«Այն, ինչում իրեն կասկածում են, բացարձակապես չի ընդունում, ասում է, որ նման արարք չի կատարել: Մեղադրանք կառաջադրվի, թե ոչ, դեռևս պարզ չէ», - ասել է Քալաշյանը:
Պարբերականը նշում է, որ վաղը կեսօրին կլրանա Սամվել Բաբայանին մեղադրանք առաջադրելու ժամկետը, որից հետո նա կամ պետք է կալանավորվի, կամ ազատ արձակվի:
Ի պատասխան պարբերականի այն հարցին, թե արդյոք այս գործի շրջանակում Սամվել Բաբայանի շրջապատից այլ ձերբակալվածներ կամ բերման ենթարկվածներ կան, պաշտպանն ասել է, որ տեղյակ չէ. «Կներեք, իմ պաշտպանյալի շահերից ելնելով, ես առայժմ այսքան տեղեկությունը կարող եմ հավելել: Եթե ավելին ասելու հարկ լինի, ինքս կասեմ»:
Բացի այդ, պաշտպանը նշել է, որ Սամվել Բաբայանը նորմալ տրամադրություն է ունեցել, ընկճված չի եղել:
«Անմեղ մարդը չի կարող ընկճված լինել»,- ասել է Քաշալյանը:
Անդրադառնալով այն հարցին, թե Սամվել Բաբայանի կարծիքով իր ձերբակալությունը քաղաքական հետապնդում է, թե ոչ, փաստաբանն ասել է, որ իր պաշտպանյալն առայժմ այդ առնչությամբ որևէ կարծիք չի հայտնել:
Քալաշյանը նաև նշել է, որ, իր կարծիքով, այսօր հարցաքննության ժամանակ Սամվել Բաբայանին տրված հարցերի թեման նախաքննական գաղտնիք է: -0-
