ՍՇՎ–ով ամբուլատոր կազմակերպություններ դիմելիությունը նվազում է. հոսպիտալացված է 681 հիվանդ. ԱՆ

ԵՐԵՎԱՆ, 18 հունվարի. /Նովոստի–Արմենիա/. Նվազել են սուր շնչառական վարակներով ամբուլատոր պոլիկլինիկական կազմակերպություններ դիմելիությունը և շտապ օգնության կանչերը: Իրավիճակը կայունանում է, հաղորդում է ՀՀ ԱՆ մամուլի ծառայությունը։

«Այսօրվա տվյալով` հանրապետության ստացիոնարներում սուր շնչառական վարակներով հոսպիտալացված է 681 հիվանդ: Վիրուսային ծագմամբ թոքաբորբերով հոսպիտալացված հիվանդներն ունեն առողջացման դրական տեղաշարժ», – նշվում է հաղորդագրության մեջ։

Գերատեսչության հաղորդմամբ, Երևանում ու մարզերում սուր շնչառական վարակներով բժշկական հաստատություններ հիմնականում դիմում են երեխաների հարցով:

Հաշվի առնելով այդ, առողջապահության նախարարության նախաձեռնությամբ, հանրապետության մանկական հաստատություններում, որպես կանխարգելիչ միջոցառում, կազմակերպվել է «համաճարակաբանական ֆիլտր»՝ գրիպանման երևույթներով հիվանդ երեխաների մուտքը բացառելու և սուր շնչառական վարակներով իրավիճակի հետագա բարդություններից խուսափելու համար:

Միջոցառումն իրականացվում է ՀՀ առողջապահության նախարարության, Երևանի քաղաքապետարանի և մարզպետարաների մասնագետների ներգրավմամբ:

Գրիպից և սուր շնչառական վարակներից խուսափելու համար ՀՀ առողջապահության նախարարությունը կրկին հորդորում է հնարավորինս նվազեցնել շփումը, հատկապես՝ երեխաների, գրիպանման երևույթներով հիվանդների հետ,գրիպանման երևույթների առկայության դեպքում մի հաճախեք աշխատանքի, երեխաներին մի թույլատրեք հաճախել մանկական հաստատություններ, հիվանդ լինելու դեպքում մի զբաղվեք ինքնաբուժմամբ և դիմեք բժշկական օգնության։ Հարկավոր է օգտագործել շատ հեղուկներ, հաճախակի օդափոխել փակ տարածքները,հաճախ լվանալ ձեռքերը:–0–