ԵՐԵՎԱՆ, 4 մարտի. /Նովոստի–Արմենիա/. ՀՀ ԱՆ «Նուբարաշեն» ՔԿՀ-ում նախապատրաստված նյութերի հիման վրա Հատուկ քննչական ծառայությունում հարուցվել է քրեական գործ, որով տեղեկություններ են ստացվել այն մասին, որ նշված հիմնարկի աշխատակիցը, չարաշահելով պաշտոնեական դիրքը, թմրամիջոց է մտցրել խուց և դրել կալանավորներից մեկի անձնական իրերի մեջ, հաղորդում է ՀՀ ՀՔԾ մամուլի ծառայությունը։
«Նկատի ունենալով, որ նյութերով տեղեկություններ են ձեռք բերվել ՔԿՀ աշխատակցի կողմից պաշտոնեական լիազորությունները չարաշահելու վերաբերյալ, ուստի Հատուկ քննչական ծառայությունում քրեական գործ է հարուցվել ՀՀ քրեական օրենսգրքի 308-րդ հոդվածի 1-ին մասով (Պաշտոնեական լիազորությունները չարաշահելը)», – նշվում է հաղորդագրության մեջ։
Կատարվում է նախաքննություն:–0–
