Նիկոլ Փաշինյանը կողմնակիցների հետ ուժով ներխուժել է ԵՊՀ–ի շենք

ԵՐԵՎԱՆ, 13 ապրիլի./Նովոստի–Արմենիա/. Ընդդիմադիր պատգամավոր Նիկոլ Փաշինյանը կողմնակիցների հետ ներխուժել է ԵՊՀ–ի շենք։

Մարտի 31-ից «Ելք» ընդդիմադիր խմբակցության ղեկավար, «Քաղաքացիական պայմանագիր» կուսակցության նախագահ Նիկոլ Փաշինյանը սկսել է բողոքի ակցիա Սերժ Սարգսյանին վարչապետի պաշտոնում հնարավոր նշանակման դեմ: Փաշինյանը սկսել է երթը Գյումրուց ու մինչև ապրիլի 13-ը մտադիր է անցնել Սպիտակ, Դիլիջան, Սևան ու Հրազդան քաղաքներով` կոչ անելով քաղաքացիներին ակտիվ մասնակցել քաղաքական գործընթացներին: Ապրիլի 13–ի երեկոյանից Փաշինյանն իր կողմնակիցների հետ նախատեսում է սկսել շուրջօրյա հանրահավաք Ազատության հրապարակում։

Ինչպես հաղորդում է «Նովոստի–Արմենիա» գործակալության թղթակիցը դեպքի վայրից, Փաշինյանն այսօր իր ակցիայի շրջանակում հասել է Երևան և շարժվել դեպի ԵՊՀ` ուսանողներին կոչ անելով մասնակցել ակցիային։

Սակայն ԵՊՀ–ի անվտանգության աշխատակիցները թույլ չեն տվել ակցիայի մասնակիցներին մտնել համալսարան` նշելով, որ շենք կարող է մտնել միայն Փաշինյանն ու հանդիպել ռեկտոր Արամ Սիմոնյանի հետ։

Սակայն Փաշինյանի կողմնակիցներն ուժով ներխուժեցին համալսարանի շենք և բղավոցներով ու սուլոցներով սկսեցին վազելով բարձրանալ ԵՊՀ–ի աստիճաններով։ Դրան զուգահեռ Փաշինյանը բարձրախոսով կոչ էր անում ուսանողներին միանալ բողոքի ակցիային։

Սակայն չնայած ռեկտորի կաբինետ ներխուժելու բավականին ագրեսիվ փորձերին, պատգամավորին չհաջողվեց հանդիպել նրա հետ, ինչից հետո Փաշինյանն ու նրա կողմնակիցները հեռացան բուհից` որոշելով մի փոքր հանգստանալ Ազատության հրապարակում նախատեսված հանրահավաքից առաջ։–0–