«Մենք մեր մասին» ամսագրի նոր համարում լուսանկարների միջոցով ներկայացվել է անկախ Հայաստանի պատմությունը

ԵՐԵՎԱՆ, 20 սեպտեմբերի. /Նովոստի–Արմենիա/. Լույս է տեսել «Մենք մեր մասին» ամսագրի նոր, հատուկ համարը` նվիրված Հայաստանի անկախության 25–ամյակին։

«Համարում ներկայացված է 1990–2016 թթ–ին տեղի ունեցած 800 կարևորագույն իրադարձությունների ժամանակագրությունը», – ամսագրի նոր համարի շնորհանդեսի ժամանակ ասաց «Մենք» պետական և ազգային արժեքների հանրահռչակման հիմնադրամի հիմնադիր և գլխավոր տնօրեն Պավել Սարգսյանը։

Նրա խոսքով` հատուկ համարի հրատարակման աշխատանքները տևել են 9 ամիս։ Ամսագրում հրապարակվել են Հայաստանի նախագահի աշխատակազմի արխիվների, Հայոց ցեղասպանության թանգարան–ինստիտուտի, IDea բարեգործական հիմնադրամի, «Արմենպրես»–ի, «Mediamax»–ի, «Photolur»–ի լուսանկարները։

Նախագիծը համաֆինանսավորվել է ՀՀ մշակույթի նախարարության և Երևանի քաղաքապետարանի կողմից։

«Այս ամսագրի էջերում ներկայացված են ոչ միայն ուրախալի իրադարձությունները, ձեռքբերումները, այլ նաև ողբերգական դեպքերը։ Այս ամենն, իսկապես, արժանի է գովեստի», – ասաց Երևանի փոխքաղաքապետ Արամ Սուքիասյանը։

Կարևորագույն մշակութային, քաղաքական, մարզական իրադարձությունները ներկայացված են ամսագրում հայերեն և անգլերեն։–0–