Լևոն Մկրտչյանը կոչ է արել քաղաքական գործիչներին «խղճալ» կրթական համակարգը նախընտրական քարոզարշավի ժամանակ

ԵՐԵՎԱՆ, 23 դեկտեմբերի. /Նովոստի-Արմենիա/. ՀՀ կրթության և գիտության նախարար Լևոն Մկրտչյանը կոչ է արել քաղաքական ուժերին «խղճալ» կրթական համակարգը նախընտրական քարոզարշավի ժամանակ։

Հայկական ուսումնական հաստատությունները` ինչպես դպրոցները, այնպես էլ բուհերը, հաճախ օգտագործվում են քաղաքական ուժերի կողմից որպես քաղաքական հարթակ, մասնավորապես, այս կամ այն քաղաքական ուժի ագիտացիայի համար ներգրավվում են կրթական հաստատությունների դասախոսական կազմի ներկայացուցիչները:

«Հասկանալի է, որ պրոֆեսիոնալ առումով, հատկապես մարզերում ընտրական, այդ թվում` նոր տեխնոլոգիական որոշումներով ներմուծվող ընթացակարգերի հետ կապված բեռը ընկնելու է ուսուցիչների ուսերին, սակայն խնդրում եմ քաղաքական ուժերին խղճալ կրթական համակարգը», - ասաց Մկրտչյանն ուրբաթ կայացած տարեվերջյան մամուլի ասուլիսին:

Միաժամանակ, նախարարը նշեց, որ անհնար է կրթական համակարգից պահանջել ապաքաղաքականություն, քանի որ դա մտածող մարդկանց հիմնական շերտերից մեկն է, որոնք կարող են իրենց քաղաքական նախապատվություններն ունենալ:

Նա կոչ արեց քաղաքական ուժերին առավելագույնս նվազեցնել համակարգի վրա ազդեցությունը և ընդգծեց, որ նախարարությունը կփորձի հետևել և վերահսկել իրավիճակը:

Հայաստանում խորհրդարանական ընտրությունները տեղի կունենան 2017 թ.-ի գարնանը: -0-