ԿԳՄՍՆ–ն պարզաբանել է դպրոցական արձակուրդների երկարաձգման շուրջ ստեղծված խառնաշփոթը

ԵՐԵՎԱՆ, 28 հոկտեմբերի./Նովոստի–Արմենիա/. ՀՀ կրթության, գիտության, մշակույթի և սպորտի նախարարությունը պարզաբանել է դպրոցական արձակուրդները ևս երկու շաբաթով երկարաձգելու շուրջ ստեղծված խառնաշփոթը։

Նշենք, որ այսօր առավոտյան հայկական որոշ ԶԼՄ–ներ, հղում անելով ԿԳՄՍՆ–ի կայքում հրապարակված հաղորդագրությանը, հայտնել էին, որ դպրոցական արձակուրդները կերկարաձգվեն ևս երկու շաբաթով` մինչև նոյեմբերի 12–ը։

Այնուհետև նախարարությունը պաշտոնապես հերքեց նշված տեղեկությունները` հորդորելով զերծ մնալ ապատեղեկատվության տարածումից

«ՀՀ կրթության, գիտության, մշակույթի և սպորտի նախարարությունը տեղեկացնում է, որ որոշ ԶԼՄ-ներում տեղ գտած այն տեղեկատվությունը, թե դպրոցական աշնանային արձակուրդը երկարաձգվել է ևս երկու շաբաթով, չի համապատասխանում իրականությանը», – նշվում է նախարարության հաղորդագրության մեջ։ 

Ավելի ուշ ԿԳՄՍՆ–ից հայտնեցին, որոշ ԶԼՄ-ներ այսօր հրապարակել են նախորդ տարվա հոկտեմբերի 27-ին ԿԳՄՍ նախարարության կայքում զետեղված հայտարարությունը՝ այն ներկայացնելով իբրև այս տարվա տեղեկատվություն, որն էլ շփոթության առիթ է հանդիսացել:–0–