Հայաստանյան շուկա է մուտք գործում թուրքական Pegasus Airlines լոուքոստերը

ԵՐԵՎԱՆ, 27 ապրիլի. /Նովոստի-Արմենիա/. Հայաստանյան շուկա թուրքական Pegasus Airlines լոուքոստերի մուտքը կբարձրացնի Հայաստանի մրցունակությունը ավիափոխադրումների ոլորտում, հինգշաբթի լրագրողներին ասաց Քաղաքական ավիացիայի գլխավոր վարչության պետ Սերգեյ Ավետիսյանը:

«Հայաստանի շատ բնակիչներ թռնում են Վրաստանով, քանի որ այնտեղից կարողանում են օգտվել թուրքական ավիաընկերությունների ծառայություններից, այդ թվում` Pegasus Airlines-ից», - ասաց Ավետիսյանը:

Նա հրաժարվեց նշել, թե որքանով ավելի մատչելի գներ կառաջարկի թուրքական լոուքոստերը:

Ընդ որում, Ավետիսյանը վտանգ չի տեսնում` կապված հայկական շուկա այս ավիաընկերության մուտք գործելու հետ: 

Հունիսի 1-ից Pegasus Airlines ավիաընկերությունը կմեկնարկի Ստամբուլից Երևանի «Զվարթնոց» միջազգային օդանավակայան չվերթերի իրականացումը: Նախատեսվում է, որ չվերթերը կիրականացվեն շաբաթը երեք անգամ` երկուշաբթի, չորեքշաբթի և ուրբաթ:

Pegasus Airlines-ը թուրքական բյուջետային ավիաընկերություն է` տեղակայված Ստամբուլում: Առավել ակտիվ լոուքոստերներից է, որը կանոնավոր և չարտերային չվերթեր է իրականցնում Թուրքիայում և գրեթե դեպի բոլոր եվրոպական երկրներ:-0-