Հայաստանի նոր Օմբուդսմենը պատրաստ է պատվով կատարել իր պարտականությունները

ԵՐԵՎԱՆ, 24 փետրվարի. /Նովոստի–Արմենիա/. Հայաստանի նորընտիր Օմբուդսմեն Արման Թաթոյանը վստահ է, որ պատվով կկատարի իր պարտականությունները։

Չորեքշաբթի ՀՀ ԱԺ փոխխոսնակ Հերմինե Նաղդալյանը Թաթոյանին ներկայացրել է Մարդու իրավունքների պաշտպանի գրասենյակի աշխատակազմին։

Արման Թաթոյանն ընտրվեց ՀՀ մարդու իրավունքների պաշտպան>>

Թաթոյանն իր խոսքում ընդգծեց, որ մոտ ապագայում կհստակեցնի այն հիմնական ուղղությունները, որոնց վրա կկենտրոնացնի իր ուշադրությունը։

Նա նշեց, որ Օմբուդսմենի աշխատանքը չի կարող պայմանավորված լինել որևէ քաղաքական գործոնով, և կուսումնասիրվեն հասարակական արձագանք ստացած բոլոր գործերը։

Պատասխանելով Հայաստանում «քաղբանտարկյալների» առկայության մասին լրագրողների հարցին` Թաթոյանը նշեց, որ չի կարող պատասխանել նման հարցերի «սիրողական մակարդակի» վրա։ 

«Ինձ հարկավոր է ժամանակ պատրաստվելու, այդ գործերը մանրամասն ուսումնասիրելու և միայն դրանից հետո պրոֆեսիոնալ գնահատական տալու համար», – ավելացրեց նա։

Ներկայացնելով նորընտիր Օմբուդսմենին` ԱԺ փոխխոսնակ Հերմինե Նաղդալյանն ընդգծեց, որ Թաթոյանը կարող է արդյունավետ աշխատել և արդարացնել հայկական հասարակության հույսերը։ 

Նաղդալյանը խորհրդանշական համարեց այն փաստը, որ Թաթոյանի ընտրությունը համընկավ երկրում ընթացող լուրջ փոփոխությունների հետ։ Նա վստահություն հայտնեց, որ նոր Օմբուդսմենի գործունեության շնորհիվ մարդու իրավունքների պաշտպանության ոլորտը Հայաստանում նոր փուլ կթևակոխի։

ՀՀ ԱԺ պետաիրավական հարցերի մշտական հանձնաժողովի նախագահ Հովհաննես Սահակյանն իր հերթին ընդգծեց,որ վստահության բավականին լուրջ հիմք է այն փաստը, որ խորհրդարանում Թաթոյանը ստացավ 96 ձայն։ Այդ ամենը կօգնի նրան կարգավորել այսօր երկրում մարդու իրավունքների պաշտպանության ոլորտում առկա բոլոր խնդիրները։

Արման Թաթոյանն ընտրվել է Հայաստանի մարդու իրավունքների պաշտպան նախօրեին խորհրդարանում տեղի ունեցած գաղտնի քվեարկության արդյունքում։–0–