ԵՐԵՎԱՆ, 7 դեկտեմբերի. /Նովոստի–Արմենիա/. Հայաստանում ծայրը ծայրին հասցնելու համար մեկ շնչի հաշվով հարկավոր է ամսական 120 523 դրամ կամ 251 դոլար, այդ մասին նշվում է Ազգային վիճագրական ծառայության «Աղքատության և կենսամակարդակի վերաբերյալ սուբյեկտիվ գնահատականները» զեկույցում, որը հիմնված է Հայաստանի տնային տնտեսությունների ներկայացուցիչների հարցման վրա։
Հարցման մասնակիցները պատասխանել են այն հարցին, թե ամսական մեկ շնչի հաշվով որքա՞ն գումար է անհրաժեշտ լավ և շատ լավ ապրելու կամ գոյատևելու համար։
Այսպիսով, 2016 թվականի հետազոտության արդյունքների համաձայն, Հայաստանի բնակիչներին մեկ շնչի հաշվով լավ կյանքի համար անհրաժեշտ է 347 234 դրամ կամ 723 դոլար, իսկ շատ լավ կյանքի համար ` 655 060 դրամ կամ 1363 դոլար։
Վերջին պաշտոնական վիճագրական տվյալների համաձայն, նվազագույն աշխատավարձը Հայաստանում կազմում է 55 հազար դրամ։ Միջին ամսական անվանական աշխատավարձը 2016 թ.–ին կազմել է 188 851 դրամ կամ 393 դոլար։
Ընդ որում, 2016թվականի հետազոտության ընթացքում կենսամակարդակը բարձրացնելու ուղղությամբ իրենց ակնկալիքների վերաբերյալ տնային տնտեսության 16 և բարձր տարիքի անդամներից նշել են հետևյալը` ինձնից ոչինչ կախված չէ, կառավարությունը պետք է ապահովի աշխատանքով և լավ պայմաններով (39.6%) կամ պլաններ չունեմ (19.3%): Հարցվածների 12.3%-ը նշել է, որ փնտրում է եկամտաբեր աշխատանք Հայաստանում, իսկ սեփական գործ Հայաստանում ցանկանում է սկսել միայն 1.1%-ը:
Հարցվածների 23.2%-ի կարծիքով նոր սերունդն ավելի լավ կապրի, 31.5%-ի կարծիքով նոր սերունդն ավելի վատ կապրի, 19.7%-ի կարծիքով` նրանք կապրեն նույն ձևով, իսկ հարցվածների 25.6%-ը դժվարացել է պատասխանել այդ հարցին։
Ըստ կենսամակարդակի սուբյեկտիվ գնահատականի` 2016թ.-ին աղքատ (ներառյալ ծայրահեղ աղքատ) են իրենց համարել բնակչության 16.6%-ը (2008թ.-ի 17.0%-ի համեմատ): Ըստ հարցվածների ինքնագնահատման` 2016թ.-ին միջին կենսամակարդակ ունեցել են հարցվածների 34.3%-ը` 2008թ.-ի 43.0%-ի համեմատ։ 45.8%-ի կարծիքով իրենց կենսամակարդակը միջինից ցածր է` 2008թ.-ի 35.6%-ի համեմատ։ Իրենց հարուստ են համարել հարցվածների 0.1%-ը` 2008թ.-ի 0.2%-ի համեմատ։
Ըստ զեկույցի, 2016 թվականի տվյալներով աղքատության մակարդակը մշտական բնակչության հաշվից կազմել է 29,4%, ինչը 0,4 կետով ավելի քիչ է, քան 2015 թվականին։ Ընդ որում, Հայաստանի բնակիչների շրջանում շատ աղքատ բնակիչների թիվը կազմում է 9.8 տոկոս, իսկ ծայրահեղ աղքատ` 1.8%: –0–
