ՀՀԿ-ում մտահոգ են իրենց ապագայով

ԵՐԵՎԱՆ, 1 հուլիսի. /Նովոստի-Արմենիա/. Ընտրական օրենսգրքում փոփոխությունները մտահոգություն են առաջացրել ՀՀԿ-ի ներսում, գրում է «Հրապարակ» թերթը:

Ինչպես նշում է պարբերականը, մինչ այժմ իշխանությունները կարողանում էին վերարտադրվել ինչպես տեղամասերից դուրս փող բաժանելով, այնպես էլ տեղամասերում մանիպուլյացիաներ անելով, այս փոփոխություններով խստացված վերահսկողական մեխանիզմները դժվարացնելու են դա:

«Հրազդանի ընտրություններն էլ աչքի առաջ ունենալով, երբ նույնիսկ առանց այս փոփոխությունների՝ մատնահետքով գրանցում, տեսանկարահանում և այլն, մի կերպ կարողացան հաղթել, հիմա համապետական ընտրություններում ավելի բարդ է լինելու: ՀՀԿ-ականներն արդեն տարբեր զրույցներում նեղսրտում են, որ ստիպված գնացին այս փոփոխություններին, հիմա մնալու է միայն մի տարբերակ՝ ընտրակաշառքը, որպեսզի կարողանան ձայն ապահովել», – գրում են հոդվածի հեղինակները։

«Ի դեպ, առանձին ՀՀԿ-ականների մտավախությունն ավելի է խորացել ռեյտինգային ցուցակների մասով, քանզի հիմա ՀՀԿ-ի ներսում է թեժ պայքար ընթանալու, լուրջ փողեր են ծախսելու, և անգամ եթե ձայն բերեն կուսակցությանը, հնարավոր է, որ չընտրվեն: Արդյունքում իրենք կմնան «բորդյուրին», իսկ ՀՀԿ կաբինետային վերնախավը, որն առանձնապես էլեկտորատ չունի, շահած դուրս կգա իրենց հաշվին», - գրում է թերթը:–0–