Արդարադատության նախարարության աշխատակիցը դիտավորյալ վնասել է «Զվարթնոց» օդանավակայանի աշխատակիցների մեքենաները

ԵՐԵՎԱՆ, 16 օգոստոսի. /Նովոստի–Արմենիա/. «Զվարթնոց» օդանավակայանի մի աշխատակից ոստիկանության «Զվարթնոց» օդանավակայանի գծային բաժնում հաղորդում էր տվել, որ օգոստոսի 13-ին, ժամը 23-ի սահմաններում իր «Նիսսան Տիդա» ավտոմեքենան կայանել է օդանավակայանի ծառայողական (անվճար) ավտոկանգառում և առավոտյան աշխատանքն ավարտելուց հետո, երբ գնացել է տուն, նկատել է, որ ավտոկանգառում անհայտ անձը դիտավորությամբ չորս կողմից վնասել ու քերծել է ավտոմեքենան՝ պատճառելով 350.000 դրամի վնաս:

ՀՀ ոստիկանության մամուլի հաղորդագրության համաձայն, նույն օրը ոստիկանությունում համանման հաղորդում է ստացվել նաև օդանավակայանի մեկ այլ աշխատակցից, որը հայտնել է, որ օդանավակայանի ծառայողական ավտոկանգառում նույն եղանակով վնասվել է իր «Լեքսուս RX350» մակնիշի ավտոմեքենան՝ պատճառելով 2.500.000 դրամի վնաս:

Ոստիկանության ծառայողների ձեռնարկած օպերատիվ-հետախուզական միջոցառումների շնորհիվ պարզվել է, որ նշված ավտոմեքենաները վնասել է 1989 թ. ծնված Արշակ Ա.-ն:

Ինչպես հաղորդում է shamshyan.com կայքը,  ոստիկանության «Զվարթնոց» օդանավակայանի բաժնի ծառայողները պարզել են, որ 28-ամյա Արշակ Ավագյանը Երևան քաղաքի Շենգավիթ վարչական շրջանի բնակիչ է, ով աշխատում է ՀՀ արդարադատության նախարարությունում։-0-

Կատարվում է հետաքննություն:-0-