ԵՐԵՎԱՆ, 7 սեպտեմբերի. /Նովոստի–Արմենիա/. Հանրային հեռուստաընկերության աշնանային եթերաշրջանում նոր հաղորդմամբ կներկայանան սիրված երգիչ, հումորիստ Արամ MP3-ին և Գարիկ Պապոյանը:
Загружается новость ... "Лево"
«Լավ երեկո» խորագիրը կրող հաղորդումը եթերում կլինի յուրաքանչյուր ուրբաթ՝ «Օրակարգ» լրատվական ծրագրի հիմնական թողարկումից հետո, հաղորդում է Հանրային հեռուստաընկերության մամուլի ծառայությունը։
Նախագիծը հիշեցնում է ողջ աշխարհում հայտնի և սիրված «Երեկոյան շոու» ձևաչափը: Հաղորդավարները ծրագրի շրջանակում կհյուրընկալեն հայաստանյան և համաշխարհային ճանաչում ունեցող անձանց, կքննարկեն շաբաթվա ընթացքում տեղի ունեցած հետաքրքիր և կարևոր իրադարձությունները:
Հանդիպումը ոչ պաշտոնական ձևաչափ կունենա, հագեցած կլինի հումորային բեմականացումներով, երաժշտական համարներով և շատ ու շատ զվարճալի ու ուշագրավ տեսանյութերով: Հյուրերը հաղորդավարների հետ միասին կմասնակցեն նաև ժամանցային ու ինտերակտիվ խաղերի:
««Լավ երեկո»-ն խոստանում է հեռուստադիտողներին լավ տրամադրություն փոխանցել և հետաքրքիր ժամանց ապահովել», – նշվում է հաղորդագրության մեջ։
Հանրային հեռուստաընկերության աշնանային նոր եթերաշրջանի մեկնարկը պաշտոնապես կտրվի սեպտեմբերի վերջին, որով և կազդարարվի մի շարք նոր ու թարմ հաղորդումների և հետաքրքիր նախագծերի սկիզբը:–0–
