ԵՐԵՎԱՆ, 6 ապրիլի. /Նովոստի-Արմենիա/. Հայաստանը ներկայացնող սուսերամարտիկ Էմմա Պողոսովան Սուսերամարտի միջազգային առաջնությունում զբաղեցրել է 5-րդ տեղը, ինչը անկախ Հայաստանի սուսերամարտի պատմության մեջ լավագույն ձեռքբերումն է, հաղորդում է ՀՀ սպորտի և երիտասարդության հարցերի նախարարության մամուլի ծառայությունը:
Սուսերամարտի` աշխարհի պատանիների և երիտասարդական առաջնությունը ընթանում է մարտի 29-ից ապրիլի 9-ը Բուլղարիայի Պլովդիվ քաղաքում:
Մրցումների խմբային փուլում խոցասուսերակիր Էմմա Պողոսովան (անձնական մարզիչ՝ Արտաշ Մադոյան) աղջիկների պայքարում նվաճել է 5 հաղթանակ, ինչը նրան իրավունք է տվել պայքարը շարունակել հաջորդ՝ օլիմպիական մրցակարգով ընթացող փուլերում, որտեղ պարտվողը դուրս է մնում հետագա պայքարից:
Պողոսովան հաջորդաբար հաղթել է Ավստրալիայի, ԱՄՆ-ի, Եգիպտոսի և Շվեյցարիայի ներկայացուցիչներին, սակայն, հաջորդ՝ ութ ուժեղագույնների պայքարում զիջելով մրցակցուհուն, բավարարվել է 5-րդ տեղով:
Գերատեսչության հաղորդմամբ, առաջնությունում մեր երկիրը ներկայացնում են 6 մարզիկ՝ Արմեն Դալլաքյանը և Անահիտ Ալոյանը՝ պատանիների պայքարում, ինչպես նաև էմմմա Պողոսովան, Մայքլ Հովհաննեսյանը, Էդուարդ Օվիկյանը և Ռազմիկ Վարդանյանը՝ երիտասարդների պայքարում:
Խոցասուսերակիրներ Էդուարդ Օվիկյանը և Ռազմիկ Վարդանյանն իրենց մրցելույթները սկսելու են վաղը՝ ապրիլի 7-ին: -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում