Էլինա Դանիելյանը շախմատի Եվրոպայի առաջնության առաջատարների թվում է

ԵՐԵՎԱՆ, 19 ապրիլի. /Նովոստի-Արմենիա/. Հայ շախմատիստուհի Էլինա Դանիելյանը Եվրոպայի կանանց առաջնության 7 տուրի արդյունքում միավորների քանակով կիսում է 1-4-րդ տեղերը:

Ինչպես հայտնում է chess.am կայքը, վերջին տուրում Էլինա Դանիելյանը պարտության մատնեց ֆավորիտներից մեկին՝ Օլգա Գիրիային, և այս պահին 5․5 մավորով Նանա Ձագնիձեի (Վրաստան), Ալեքսանդրա Գորյաչկինայի (Ռուսաստան) և Դարյա Պուստովոյտովայի (Ռուսաստան) հետ կիսում է 1-4-րդ տեղերը:

Հայաստանի մյուս ներկայացուցիչների իրավիճակը հետևյալն է` Լիլիթ Մկրտչյանը 7-րդ պարտիայի միավորը կիսել է Աննա Վարակոմսկայի հետ և այժմ ունի 4 միավոր, Մարիա Գևորգյանը հաղթել է Գովհար Բեյդուլաևային, իսկ Լիլիթ Գալոյանը պարտվել է Ցոլակիդու Ստավրուլային։ Վերջիններս ունեն 3․5-ական միավոր։

Եվրոպայի կանանց առաջնությունը բաղկացած է 11 տուրից և կավարտվի ապրիլի 22-ին: Առաջնության մրցանակային ֆոնդը կազմում է 75 հազար եվրո, որոնցից 12 հազարը կստանա հաղթողը: -0-