ԵՐԵՎԱՆ, 18 հունիսի./Նովոստի–Արմենիա/. Ռուսաստանի սահմանների մոտ ՆԱՏՕ–ի երկրների ռազմական օբյեկտների տեղակայումը հատուկ ուշադրության և անհրաժեշտ քայլերի առիթ է, որոնք ուղղված են անվտանգության ապահովմանը։ Այս մասին, ՏԱՍՍ–ի հաղորդմամբ, ուրբաթ հայտարարել է ՌԴ նախագահի մամուլի քարտուղար Դմիտրի Պեսկովը։
«Ամեն դեպքում մեր սահմանների մոտ դաշինքի անդամ երկրների ռազմական ենթակառուցվածքի օբյեկտների բացումն առիթ է մեր հատուկ ուշադրության համար, ինչպես նաև մեր քայլերի պատճառ, որոնք անհրաժեշտ են մեր անվտանգության և մեր շահերի ապահովման համար», – ասել է Պեսկովը` մեկնաբանելով Ադրբեջանում Թուրքիայի ռազմաբազայի հնարավոր ստեղծման մասին տեղեկատվությունը։
Պեսկովը նաև հայտարարել է, որ Ռուսաստանն ուշադիր հետևում է Ադրբեջանում թուրքական ռազմաբազայի հնարավոր ստեղծման մասին տեղեկատվությանը։
«Անխոս, սա մեր խիստ ուշադրության հարցն է», – ասել է Կրեմլի ներկայացուցիչը` մեկնաբանելով համապատասխան տեղեկատվությունը։
«Մենք փոխգործակցում ենք Թուրքիայի հետ Անդրկովկասում իրավիճակի կայունացման հարցում», – Պեսկովի խոսքերը մեջբերում է ՏԱՍՍ–ը։
Թուրքիայի նախագահ Ռեջեփ Թայիպ Էրդողանն Ադրբեջանից վերադառնալուց հետո լրագրողների հետ շփման ժամանակ չի բացառել, որ Բաքվում Շուշիի հռչակագրի ստորագրման շրջանակում կարող է խոսք լինել ադրբեջանական տարածքում թուրքական ԶՈւ–ի ռազմաբազայի ստեղծման մասին։
«Այս թեման կարող է զարգանալ Ադրբեջանի նախագահ Իլհամ Ալիևի և ՌԴ նախագահ Վլադիմիր Պուտինի խորհրդակցությունների ընթացքում», – ավելացրել է Էրդողանը։–0–