ԵՐԵՎԱՆ, 28 փետրվարի․/Նովոստի–Արմենիա/․ Երևանում մարտի 14–ին կանցկացվի Capital Markets Armenia երկրորդ կոնֆերանսը, որի կազմակերպիչն է Cbonds Congress–ը՝ Cbonds–ի աջակցությամբ։
Միջոցառումն իր շուրջ կհամախմբի կարգավորիչների, բանկերի, ներդրումային ընկերությունների, միջազգային ֆինանսական ինստիտուտների, վարկանիշային գործակալությունների և ենթակառուցվածքային ընկերությունների ներկայացուցիչներին՝ քննարկելու երկրում կապիտալի շուկաների աշխատանքի տարբեր ոլորտները։
Ինչպես հայտնում են կազմակերպիչները, կոնֆերանսի շրջանակում նախատեսվսծ են զեկույցներ և պանելային բանավեճեր Հայաստանի տնտեսության և ֆինանսական համակարգի, արժեթղթերի տեղական շուկայի, պարտատոմսերի տեղաբաշխման և IPO–ի հնարավոր բումի, ֆինանսական շուկայի ենթակառուցվածքի և մասնակիցների համար նախատեսված ՏՏ լուծումների, կրիպտոարժույթի դերակատարության, արժեթղթերի շուկայի զարգացման և տարբեր շուկաներում ներդրումային գաղափարների վերաբերյալ։
Բանախոսների թվում են ՀՀ էկոնոմիկայի փոխնախարար Ռաֆայել Գևորգյանը, Հայկական ֆոնդային բորսայի (AMX) գլխավոր տնօրեն Հայկ Եգանյանը, Team Telecom Armenia–ի ֆինանսական տնօրեն Կարեն Մնացականյանը, Հայաստանի էլեկտրական ցանցերի էկոնոմիկայի և ֆինանսների տնօրեն Արմեն Արշակյանը։
«ԱՄԻ Նովոստի–Արմենիա»–ն կոնֆերանսի ինֆորմացիոն հովանավորներից է։
Առաջին կոնֆերանսը տեղի է ունեցել 2023թ․–ի մարտի 17–ին և համախմբել է 213 մասնակցի տարբեր երկրներից։–0–