ԵՐԵՎԱՆ, 19 դեկտեմբերի. /Նովոստի–Արմենիա/. Ամանորը ոչ միայն բարձր տրամադրություն ու մոտալուտ հրաշքի սպասում է, այլև մեծ ծախսեր։ Ծախսերի հիմնական մասն, իհարկե, բաժին է հասնում տոնական սեղանին։
«Նովոստի–Արմենիա» գործակալության թղթակիցն այցելել է Երևանի մի շարք խանութներ և սուպերմարկետներ ու պարզել, թե որքա՞ն արժե տոնական սեղանի մթերքների նվազագույն զամբյուղը։
Միջին վիճակագրական երևանցու ամանորյա ավանդական սեղանն անհնար է պատկերացնել առանց խոզի ազդրի, մսով լցոնած բլիթների, բաստուրմայի, «Օլիվիե» աղցանի, մանդարինի, հայկական շամպայնի և չրի։
Այս մթերքների զամբյուղն, իհարկե, պայմանական է, սակայն այն պատկերացում է տալիս նվազագույն ծախսերի մասին։
Եվ այպես, բյուջետային ամանորյա սեղան գցելու համար ձեզ անհրաժեշտ է խոզի ազդր (5կգ), մսով լցոնած 1 բաժին բլիթներ (20 հատ), մեկ բաժին տոլմա (35 հատ), երկու աղցան` բազուկով և օլիվիե, երշիկ, սուջուխ, բաստուրմա, հայկական պանիր (150–ական գրամ), 1 բանկա զեյթուն, ալկոհոլային և զովացուցիչ ըմպելիքներ (1 շիշ օղի, գինի, շամպայն, հանքայուն ջուր և քաղցր գազավորված ջուր (3 շիշ)), բնական հյութ (2 տուփ), հաց, թարմ բանջարեղեն (վարունգ և լոլիկ` 500–ական գրամ) և կանաչեղեն։
Այս մթերքներից կազմված ամանորյա սեղանը կարժենա 34 650 դրամ կամ մոտ 75 դոլար` ելնելով ստորև նշված հաշվարկից.
Խոզի ազդր – 15 հազար դրամ
1 բաժին բլիթ – 1480 դրամ
1 բաժին տոլմա – 3000 դրամ
2 աղցան – 2970 դրամ
Երշիկ, սուջուխ, բաստուրմա, պանիր – 3940 դրամ
Հյութեր – 6660 դրամ
Հաց, բանջարեղեն և կանաչեղեն – 1600 դրամ
Ավելի ծախսատար տոնական սեղանն, իհարկե, ավելի ախորժելի ու գեղեցիկ տեսք կունենա, սակայն ծախսերը ևս ավելի լուրջ կլինեն։
Այսպես, եթե վերը նշված ցանկին ավելացնենք նաև հնդկահավը (5կգ), որը վերջին տարին փորձում է խոզի ազդրից «գրավել» ամանորյա տոնական սեղանի գլխավոր ճաշատեսակի տեղը, ապա մենք ստիպված կլինենք ծախսել ևս 10 հազար դրամ։
Իսկ հինգ աստղանի հայկական կոնյակի կես լիտրանոց շիշը, որը կզարդարի ցանկացած սեղան, կարժենա ևս 5200 դրամ։
Սակայն ի՞նչ ամանորյա սեղան առանց մրգի։ Պետք է գնել գոնե 1 կգ խնձոր (500 դրամ), նարինջ (700 դրամ), բանան (750 դրամ), մանդարին (550 դրամ) և արքայանարինջ (400), իսկ դա մեր գումարին կավելացնի ևս 2900 դրամ։
Տոնական սեղանն, իհարկե, հնարավոր չէ պատկերացնել առանց դեսերտի։ Հայրենական արտադրության շոկոլադե կոնֆետների 1 կգ կարժենա 3000 դրամ, չարազի կիլոգրամը (տարատեսական ընկուզեղեն` 200–ական գրամ)` հունական ընկույզ (1200 դրամ), արախիս (340), պնդուկ (700), նուշ (1800), 200 գրամ չամիչ (800 դրամ) և 8 կտոր թխվածք (յուրաքանչյուրը 600–ական դրամ) կավելացնի տոնական ծախսերը ևս 12 640 դրամով։
Արդյունքում, ավելի ճոխ ամանորյա սեղանի համար ստիպված կլինեք ծախսել 65 500 դրամ կամ մոտ 135 դոլար։
Ծախսեր–ծախսեր, սակայն պետք չէ մոռանալ, որ Ամանորը մեծահասակների ու երեխաների ամենասիրելի տոնն է։ Զուր չէ, որ ժողովուրդն ասում է. «Ինչպես կդիմավորես Ամանորն, այնպես էլ կանցնի ողջ տարին»։ Ախորժելի ճաշատեսակները, բարի կենացները, ընտանիքի անդամների անկեղծ ժպիտն ու ամանորյա նվերներին անհամբեր սպասող երեխաների անհոգ ծիծաղը ձեզ կստիպի մոռանալ բոլոր ծախսերը։–0–
