Վազգեն Մանուկյանն ընդդիմության կողմից առաջադրվել է որպես վարչապետի միասնական թեկնածու. Վանեցյանը՝ հետագա քայլերի մասին. (ՎԻԴԵՈ)
17:15
03 Դեկտեմբերի 2020
ԵՐԵՎԱՆ, 3 դեկտեմբերի./Նովոստի-Արմենիա/. Ընդդիմադությունը որոշում է կայացրել վարչապետի պաշտոնում առաջադրել միասնական թեկնածուին՝ Վազգեն Մանուկյանին, լրագրողների հետ զրույցի ժամանակ հայտարարել է «Հայրենիք» կուսակցության առաջնորդ Արթուր Վանեցյանը:
Загружается новость ... "Лево"
«Նա վարչապետ ընտրվելու դեպքում կասեցնելու է իր կուսակցական պատկանելությունը, լինելու է ապակուսակցական վարչապետ և որոշակի ժամանակ անց պարտավորվելու է անցկացնել արտահերթ խորհրդարանական ընտրություններ, որոնց ինքը չի մասնակցելու և չի աջակցելու որևէ քաղաքական ուժի»,- հայտնել է Վանեցյանը հինգշաբթի լրագրողների հետ զրույցում:
Պատասխանելով հարցին այն մասին, որ Մանուկյանի թեկնածությունը հակասական է ընդունվում հանրության շրջանում, Վանեցյանը նշել է, որ անթերի մարդ աշխարհում չկա:
«Վազգեն Մանուկյանն ի՞նչ է, կոռուպցիոնե՞ր է, թալանչի՞ է, հայրենասեր չէ՞, անգրագե՞տ է: Նա մի մարդ է, որը եղել է ՀՀ-ի առաջին վարչապետը, որը եղել է Ղարաբաղ կոմիտեի ղեկավարը, ով բանակաշինության մեջ ունեցել է ամենամեծ լուման: Այսինքն Վազգեն Մանուկյանի պաշտպանության նախարար դառնալուց հետո մեր բանակը դարձել է կանոնավոր բանակ, ունեցել ենք զինված ուժեր»,- հայտնել է նա:
Վանեցյանն ընդգծել է, որ Վազգեն Մանուկյանն իր անցած ճանապարհով, ունեցած փորձով կարող է նստել բանակցային սեղանի շուրջ և լուծել Հայաստանի առջև ծառացած այն դժվարագույն խնդիրները, որոնց մեջ հայտնվել ենք
«Առաջին քայլն արվեց, հայտարարվեց վարչապետի միասնական թեկնածուն: Առաջիկա քայլերի մասին կասվի առաջիկա հանրահավաքին, Վազգեն Մանուկյանը ելույթ կունենա և կներկայացնի առաջիկա անելիքների մասին հստակ ծրագիր»,- հայտնել է նա:
Միաժամանակ, Վանեցյանը, պատասխանելով այն հարցին, թե արդյոք Մանուկյանի թեկնածությունը քննարկվել է Ռուսաստանի հետ, նշել է, որ ներքաղաքական հարցերը պետք է լուծվեն բացառապես ներքաղաքական օրակարգում:
«Այո, Ռուսաստանի Դաշնությունը մեր ռազմավարական կարևորագույն գործընկերն է, բայց կարծում եմ, որ Հայաստանի ներքին հարցերը պետք է լուծեն ՀՀ քաղաքացիները և ՀՀ քաղաքական հԱսարակական շրջանակները»,- նշել է Վանեցյանը:
Նա ընդգծել է, որ հանրության մեջ կա գրեթե 100 տոկոսանոց կոնսենսուս, որ Նիկոլ Փաշինյանը ոչ մի տեսանկյունից այլևս իրավունք չունի զբաղեցնելու վարչապետի պաշտոնը:
«Այդ մոտեցումը կա նաև խորհրդարանում: Միաժամանակ, պետք է ի վերջո նոր վարչապետի ընտրության հարցը լուծեն պատգամավորները: Այսօր կա այդ պահանջը, որ նոր վարչապետ պետք է լինի: Ուղղակի պետք է շարունակենք մեծացնել հանրային ճնշման մեխանիզմները, և շատ կարճ ժամանակահատվածում ԱԺ-ում եղած պատգամավորները դուրս կգան իրենց ներքին վախերից և կքվեարկեն ժողովրդի թեկնածուի օգտին»,- նշել է Վանեցյանը:
Ընդդիմադիրի խոսքով, Նիկոլ Փաշինյանի՝ մեկ օր ավել իշխանության ղեկին մնալը ազգային անվտանգության սպառնալիք է մեր երկրի և մեր ժողովրդի համար:
«Մեր ժողովուրդը պետք է գիտակցի, որ այստեղ ոչ թե քաղաքական պայքար է, այլ պայքար է հանուն մեր Հայրենիքի փրկության: Բոլորը պետք է դուրս գան փողոց և վճռական խոսքն ասեն ու հեռացնեն այս ապազգային իշխանություններին: Եվ շատ արագ ԱԺ-ն պետք է նախաձեռնի նոր վարչապետի ընտրություններ և մեր երկիրը կարողանանք դնել ճիշտ ուղու վրա: Քաղաքական ճգնաժամը ՀՀ-ում շատ խորն է և այդ լուծումը առաջիկա օրերին կտրվի»,- հայտնել է Վանեցյանը:
Երևանում վերջին շաբաթների ընթացքում կազմակերպվում են բողոքի ակցիաներ 17 ընդդիմադիր կուսակցությունների կողմից` ՀՀ վարչապետ Նիկոլ Փաշինյանի հրաժարականի պահանջով։ Քաղաքական գործիչներն ու շարքային քաղաքացիները վրդովվել էն նոյեմբերի 9–ին Փաշինյանի, Ռուսաստանի և Ադրբեջանի առաջնորդների կողմից ստորագրված արցախյան հայտարարության կապակցությամբ, որը նախատեսում է զգալի տարածքային զիջումներ Ադրբեջանին։–0–
Սննդամթերքի անվտանգության տեսչական մարմնի արտահերթ ստուգումը փաստում է՝ «Ջերմուկի» պարունակության մեջ չի կարող քացախ լինել, դա տեխնիկապես էլ հնարավոր չէ․ ՎԻԴԵՈ