Ադրբեջանից վերադարձած 3 գերիներն անցնում են բժշկական փորձաքննություն, արդեն խոսել են հարազատների հետ. պատգամավոր

ԵՐԵՎԱՆ, 4 մայիսի./Նովոստի–Արմենիա/. Գերեվարված երեք մեր հայրենակիցն արդեն Երևանում է։ Ինքնաթիռը քիչ առաջ վայրէջք կատարեց, ռուս խաղաղապահների հրամանատար Ռուստամ Մուրադովի և Ազգային անվտանգության ծառայության ջանքերով նրանք վերադարձվել են հայրենիք, հայտնել է «Իմ քայլը» խմբակցության պատգամավոր Նազելի Բաղդասարյանը Facebook–յան իր էջում։  

Նշենք, որ քիչ առաջ հայտնի դարձավ, որ երեք հայ գերի Ադրբեջանից վերադարձել է Հայաստան։ 

«Այս պահին նրանք անցնում են բժշկական փորձաքննություն, հասցրել են կապվել և խոսել հարազատների հետ։ Մեկը Շիրակի մարզից Շուխյան Սամվելն է։ Բարի և շուտափույթ վերադարձ մաղթենք նաև մեր մյուս տղաներին», – գրել է Բաղդասարյանը։–0–