«Հաց բերող» Արթուր Սարգսյանի հիշատակին նվիրված հանրահավաք–երթն ավարտվեց. ցուցարարները կրկին կհավաքվեն (ՖՈՏՈ)

ԵՐԵՎԱՆ, 16 մարտի. /Նովոստի–Արմենիա/. Երևանում ավարտվեց «Հաց բերող» Արթուր Սարգսյանի մահվան օրվա կապակցությամբ կազմակերպված հանրահավաք – երթը։

Նախորդ տարվա հուլիսին Արթուր Սարգսյանը սեփական մեքենայով ներխուժել էր ՊՊԾ գնդի տարածք, որպեսզի «Սասնա ծռերին» սնունդ փոխանցի։

Դեկտեմբերի վերջին նա ազատ էր արձակվել երկրից չբացակայելու ստորագրության ներքո, սակայն փետրվարին կրկին կալանավորվել էր խափանման այդ միջոցի համար սահմանված ընթացակարգերի խախտման պատճառով։ Երկրորդ կալանավորումից հետո Սարգսյանը հացադուլ էր հայտարարել, ինչի պատճառով նրա առողջական վիճակը կտրուկ վատացել է։

2017 թ.–ի մարտի 6–ին Արթուր Սարգսյանն ազատ էր արձակվել մի խումբ պատգամավորների երաշխավորությամբ

«Ժառանգություն» ընդդիմադիր կուսակցության ներկայացուցիչ Դավիթ Սանասարյանը հայտարարեց, որ հաջորդ ուրբաթ կրկին հանրահավաք կանցկացվի։

«Կհանդիպենք մեկ շաբաթից։ Հուսով եմ` մինչ այդ մենք համաձայնություն ձեռք կբերենք այլ քաղաքական կուսակցությունների հետ միավորվելու մասին և կհասնենք ռեժիմի փոփոխության», – ասաց Սանասարյանը։

«Հիմնադիր խորհրդարան» ընդդիմադիր շարժման առաջնորդ Ժիրայր Սեֆիլյանի զինված կողմնակիցները 2016 թ.–ի հուլիսի 17–ին մուտք են գործել ՊՊԾ գնդի տարածք։ Նրանք պահանջում էին իշխանության հրաժարականը և ազատ արձակել Ժիրայր Սեֆիլյանին, ով կալանավորվել էր մի խումբ անձանց կողմից զենք ապօրինի պահելու կասկածանքով։

Հուլիսի 17-31-ը, մինչ խումբը գրավել էր շենքը, ՊՊԾ գրավված գնդի շենքի տարածքում անցկացվում էին բողոքի ակցիաներ՝ ի աջակցություն զինված խմբավորման, որոնք պարբերաբար վերածվում էին իրավապահների հետ բախումների, որոնց ընթացքում տասնյակ մարդիկ մարմնական վնասվածքներ էին ստացել: Զանգվածային անկարգությունների փաստի առթիվ հարուցվել էին քրեական գործեր, մի խումբ անձանց մեղանդրանք էր առաջադրվել:

Հուլիսի 31-ին զինված խմբավորումը հանձնվեց իշխանություններին: Այդ ընթացքում զոհվել է 3 ոստիկան, խմբավորման անդամների և իրավապահ մարմինների աշխատակիցների շրջանում կային վիրավորներ: Քրեական գործը, որի շրջանակում կալանավորվել են տասնյակ մարդիկ, հարուցվել է ՀՀ ՔՕ 219-րդ հոդվածի (շենքեր, շինություններ, տրանսպորտի, հաղորդակցության կամ կապի միջոցներ զավթելը) և 235-րդ հոդվածի 3-րդ մասի (ապօրինի զենք զինամթերք ձեռք բերել, իրացնել, պահել, փոխադրել) հատկանիշներով: –0–