Վրացի գրոսմայստերը որակազրկվել է Տիգրան Պետրոսյանի հետ խաղում գաղտնի հեռախոսից օգտվելու համար

ԵՐԵՎԱՆ, 13 ապրիլի. /Նովոստի–Արմենիա/. Վրացի գրոսմայստեր Գայոզ Նիգալիձեն որակազրկվել է Դուբայում անցկացվող առաջնության խաղի ժամանակ գաղտնի հեռախոսից օգտվելու համար։ Այդ մասին հայտնում է առաջնության կայքը, գրում է Лента.ру-ն։

Հայ շախմատիստ Տիգրան Պետրոսյանի հետ խաղում Նիգալիձեն մի քանի անգամ գնացել է զուգարան, որտեղ իր խաղը համեմատել է սմարթֆոնի հավելվածի հետ։ Ինչ-որ պահի առաջնության կազմակերպիչները մտել են ազատ զուգարանը և այնտեղ գտել հեռախոսը, որտեղ բաց էր շախմատի հավելվածը և վերլուծված էր Նիգալիձեի պարտիան։

Վրացու մրցակիցը նույնպես հայտնել էր իր կասկածների մասին, քանի որ Նիգալիձեն հաճախ էր զուգարան գնում որոշիչ քայլերից առաջ։ Ինքը` վրացի գրոսմայստերն, ասել էր, որ ոչ մի սարքից չի օգտվել։

Միջադեպի մասին զեկուցվել է Շախմատի միջազգային ֆեդերացիայի ղեկավարությանը (ՖԻԴԵ)։ Նիգալիձեին սպառնում է երեք տարով հեռացում, իսկ կրկնակի խախտման դեպքում` որակազրկում 15 տարով։ -0-