ԵՐԵՎԱՆ, 26 հունվարի. /Նովոստի–Արմենիա/. Մյունխենի «Բավարիայի» տնօրեն Կարլ–Հայնց Ռումենիգեն կարծում է, որ քանի դեռ Ֆուտբոլի միջազգային ֆեդերացիայի (ՖԻՖԱ) ընտրություններին մասնակցում է կազմակերպության ներկայիս տնօրեն Յոզեֆ Բլատերը, ոչ ոք հաղթանակի հնարավորություն չունի։
1998 թվականից ՖԻՖԱ–ն գլխավորող Բլատերն իր թեկնածությունն է առաջադրել հինգերորդ կառավարման ժամկետի համար, ընտրությունները կանցկացվեն մայիսին։ Առաջադրվելու ցանկություն են հայտնել նաև ՖԻՖԱ–ի նախկին գլխավոր քարտուղար Ժերոմ Շամպանը, Հորդանանի արքայազն Ալի բին Ալ Հուսեյնը և Ֆրանսիայի հավաքականի նախկին ֆուտբոլիստ Դավիդ Ժինոլան։ ՈՒԵՖԱ–ի նախագահ Միշել Պլատինին, ով դեմ էր հանդես գալիս Բլատերի թեկնածությանը, հրաժարվել է իր թեկնածությունից։
«Նույնիսկ Պլատինին Բլատերի դեմ ոչ մի հնարավորություն չունի։ Քանի դեռ նա մասնակցում է ընտրություններին, նա է հաղթելու։ Նրա իշխանությունը չափազանց մեծ է, մեծամասնությունը կքվեարկի նրա օգտին»,– Ռումենիգեի խոսքն է մեջբերում DPA–ն, հաղորդում է ՌԻԱ Նովոստին։
Երկուշաբթի Բլատերը հայտնել է, որ ՈՒԵՖԱ–ի ընդդիմությունն այնքան համարձակություն չունի, որ ՖԻՖԱ–ի նախագահի ընտրություններում մրցի իր հետ։ -0-
