Պելեն հերքել է իրեն ինտենսիվ թերապիայի բաժանմունք տեղափոխելու վերաբերյալ լուրերը

ԵՐԵՎԱՆ, 28 նոյեմբերի. /Նովոստի–Արմենիա/. Սան Պաուլուի հիվանդանոցում գտնվող բրազիլացի լեգենդար ֆուտբոլիստ Պելեն հայտարարել է, որ իրեն լավ է զգում, և հերքել է ինտենսիվ թերապիայի պալատ տեղափոխվելու մասին տեղեկությունը, գրում է ՌԻԱ Նովոստին։

Պելեն հոսպիտալացվել է երկուշաբթի միզուղիների ինֆեկցիոն հիվանդության պատճառով։ Հինգշաբթի տեղեկություն է տարածվել, որ 74–ամյա բրազիլացին տեղափոխվել է ինտենսիվ թերապիայի պալատ։

«Ես ցանկանում եմ օգտվել հնարավորությունից և հայտնել, որ լավ եմ զգում։ Ինձ չեն տեղափոխել ինտենսիվ թերապիայի բաժանմունք, պարզապես գաղտնիության նկատառումներից ելնելով` հատուկ պալատ են բերել։ Թեև ես գնահատում եմ այն բոլոր այցելուներին, ովքեր եկել են ինձ տեսակցելու, բայց ինձ իսկապես պետք է շարունակել բուժումը հանգիստ պայմաններում։ Հաճելի է զգալ ձեր սերն ու աջակցությունը, և շնորհակալ եմ Աստծուն, որ լուրջ բան չկա»,– գրել է Պելեն Twitter–ի իր էջում։

Ավելի վաղ Պելեն արդեն երկու անգամ եղել է Սան Պաուլուի Ալբերտ Էյնշթեյնի հիվանդանոցում, որտեղ սկզբում ստամոքսի խնդիրներ են հայտնաբերվել, իսկ ավելի ուշ երիկամից քարի հեռացման վիրահատություն է կատարվել։ Մինչ այդ Պելեն աչքերի և կոնքազդրոսկրի փոխարինման վիրահատություններ է տարել։
-0-