Մարադոնան հայտարարել է, որ ՖԻՖԱ–ի նախագահ Բլատերը փորձում է նրան դուրս հանել ֆուտբոլից

ԵՐԵՎԱՆ, 14 նոյեմբերի. /Նովոստի–Արմենիա/. Արգենտինացի լեգենդար ֆուտբոլիստ Դիեգո Մարադոնան հայտարարել է, որ չի կարող նորից զբաղվել մարզչական աշխատանքով, որովհետև Ֆուտբոլի միջազգային ֆեդերացիայի նախագահ (ՖՒՖԱ) Յոզեֆ Բլատերը փորձում է նրան հանել ֆուտբոլից, գրում է ՌԻԱ Նովոստին։

Մարադոնան Բրազիլիայի աշխարհի առաջնության ժամանակ քննադատել է ՖԻՖԱ–ի որոշումը` իտալացի պաշտպան Ջորջո Կյելինիին կծելու համար Ուրուգվայի հավաքականի հարձակվող Լուիս Սուարեսին որակազրկելու մասին, ինչից հետո ասվել էր, որ ՖՒՖԱ–ի ներկայացուցիչները չեն ցանկանում տեսնել արգենտինացուն տրիբունաներում խաղերի ժամանակ։

«Բլատերը չէր թողնում ինձ նայել աշխարհի առաջնության խաղերը, որովհետև ես նրան բացահայտեցի, դիմակը պատռեցի,– Daily Mirror–ը ներկայացնում է Մարադոնայի խոսքը։ – Այժմ ես չեմ կարող գլխավորել ԱՄԷ–ում ոչ մի թիմ, որովհետև նա զանգահարում է ակումբների նախագահներին և ասում, որ ինձ հետ գործ չունենան։ Այդպես են ինձ ասել։ Նրանք ինձ սիրում են և հրավիրում ամենուրեք, իսկ ես ցանկանում եմ դառնալ Դուբայի թիմերից մեկի մարզիչը, բայց հասկանում եմ, որ Բլատերն ինձ ուզում է դուրս հանել ֆուտբոլից»։

Մարադոնան գլխավորում էր Արգենտինայի հավաքականը 2008-2010 թվականներին, ինչից հետո աշխատում էր Դուբայի «Ալ Վասլի» հետ 2011-2012 թվականներին։ 2014 թվականին լուրեր էին պտտվում, թե 54–ամյա մասնագետն աշխատում է Վենեսուելայի և Պաղեստինի հավաքականների հետ։ -0-