Ֆուտբոլի աշխարհի 2018 թ.-ի առաջնությունը կանցկացվի Ռուսաստանում, տեղափոխման մասին խոսք անգամ լինել չի կարող. Բլատեր

ԵՐԵՎԱՆ, 3 սեպտեմբերի. /Նովոստի-Արմենիա/. Ֆուտբոլի միջազգային ֆեդերացիայի (ՖԻՖԱ) նախագահ Յոզեֆ Բլատերը հայտարարել է, որ խոսք անգամ լինել չի կարող Ֆուտբոլի աշխարհի 2018 թ.-ի առաջնությունը Ռուսաստանից մեկ ուրիշ վայր տեղափոխելու մասին:

Երեքշաբթի հայտնի դարձավ, որ Ռուսաստանի նկատմամբ Եվրամիության նոր պատժամիջոցները կարող են անդրադառնալ ոչ միայն տնտեսությանն ու ֆինանսական հատվածին, այլ նաև մշակույթին և սպորտին: Այս մասին հաղորդել է ՉՏԿ չեխական գործակալությունը՝ հղում անելով պատժամիջոցների նախագծին, որը ստացել է Չեխիայի կառավարությունը Բրյուսելից: Նախագծում առաջարկվում է, որպեսզի ԵՄ անդամ-երկրները քննարկեն մի շարք միջազգային մարզական կազմակերպություններում Ռուսաստանի անդամակցության դադարեցման հարցը:

«Աշխարհի առաջնությունը կանցկացվի Ռուսաստանում, տեղափոխման մասին խոսք անգամ լինել չի կարող: Մենք վստահում ենք աշխարհի 2018 և 2022 թթ.-ի առաջնությունների կազմակերպիչներին: Այժմ մենք սպասում ենք ՖԻՖԱ-ի էթիկայի հարցերով կոմիտեի հայտարարությանը», - Բլատերի խոսքերը մեջբերում է Spiegel.de-ն, հաղորդում է «ՌԻԱ Նովոստին»:

ՖԻՖԱ-ն աշխարհի 2018 և 2022 թթ.-ի առաջնությունների հյուրընկալ-երկրների (Ռուսաստան և Քաթար) ընտրության իրավաչափության հարցով քննություն էր սկսել: ՖԻՖԱ-ի էթիկայի հարցերով կոմիտեի ներկայացուցիչ Մայքլ Գարսիան պետք է հուլիսին ներկայացներ այդ գործով քննության արդյունքների մասին զեկույցը:-0-