ԵՐԵՎԱՆ, 17 հուլիսի. /Նովոստի-Արմենիա/. Ռուս թենիսիստուհի Մարիա Շարապովան տարվա լավագույն թենիսիստուհին է ճանաչվել ESPN կայքում անցկացված հարցման արդյունքում:
Շարապովան երրորդ անգամ անընդմեջ խաղացել է «Ռոլան Գարոսի» եզրափակչում և երկրորդ անգամ դարձել է մրցաշարի հաղթող՝ պարտության մատնելով ռումինացի թենիսիստուհի Սիմոնա Խալեպին: Օգտատերերը լավագույն թենիսիստ են ճանաչել իսպանացի Ռաֆայել Նադալին, ով հաղթել է Պրոֆեսիոնալ թենիսիստների ասոցիացիայի (ATP) 10 մրցաշարերում, որոնց թվում են՝ «Ռոլան Գարոսը» և US Open-ը, նա սեզոնի ավարտին АТР-ի վարկանիշում զբաղեցրել է առաջին տեղը, հաղորդում է ՌԻԱ Նովոստին:
Լավագույն միջազգային մարզիկ է ճանաչվել «Ռեալ» իսպանական ակումբի և Պորտուգալիայի հավաքականի հարձակվող Քրիշտիանու Ռոնալդուն, ով 56 ակումբային հանդիպումներում 66 գոլի հեղինակ է դարձել և նվաճել է «Ոսկե գնդակը», նա նաև ՖԻՖԱ-ի կողմից ճանաչվել է տարվա լավագույն ֆուտբոլիստը: ԱՄՆ հավաքականի անդամների շրջանում լավագույն օլիմպիականներ են ճանաչվել սնոուբորդիստներ Սեյջ Կոցենբուրգն ու Ջեյմի Անդերսոնը, ովքեր Սոչիում կայացած Ձմեռային օլիմպիադայի ժամանակ սլոուպսթայլ ոճում ոսկե մեդալներ են նվաճել:
Լավագույն մարզիչ է ճանաչվել Գրեգ Պոպովիչը, ում շնորհիվ «Սան Անտոնիո Սփերս» ակումբը հինգերորդ հաղթանակն է տոնել NBA-ի առաջնությունում, իսկ «լավագույն չեմպիոնական ելույթ» անվանակարգում հաղթել է «Սան Անտոնիո Սփերս» ակումբի հարձակվող Կավայ Լեոնարդը, ով NBA-ի եզրափակիչ փուլի շրջանակում «Մայամի Հիթի» հետ հանդիպման ժամանակ ամենաարժեքավոր խաղացողն է ճանաչվել: NBA-ի լավագույն խաղացողի մրցանակին է արժանացել կանոնավոր առաջնության ամենաարժեքավոր խաղացող Քևին Դյուրանթին, ով խաղում է «Օքլահոմա Սիթի Թանդեր» ակումբում: Լավագույն բասկետբոլիստուհի է ճանաչվել WNBA չեմպիոն Մայիա Մուրը, ով «Մինեսոտա Լինքս» ակումբի անդամ է:
Լավագույն հոկեիստ է ճանաչվել «Փիթսբուրգ Փինգվինզ» ակումբի հարձակվող Սիդնի Քրոսբին, ով վաստակել է 104 (36+68) միավոր ՆԽԼ-ի կանոնավոր առաջնությունում ցուցադրած արդյունավետության համար: MLS-ի (Ֆուտբոլի գլխավոր լիգա) լավագույն խաղացող է ճանաչվել «Նյու Յորք Ռեդ Բուլզ» ակումբի ավստրալացի կիսապաշտպան Թիմ Քեհիլը: MLB-ի լավագույն բեյսբոլիստ է ճանաչվել Միգել Քաբրերան «Դեթրոյթ Թայգերսից»:
Լավագույն մարտիկներ են ճանաչվել բռնցքամարտիկ Ֆլոյդ Մեյուեզեր կրտսերը և խառը մենամարտերի ներկայացուցիչ Ռոնդա Ռուսեյը: Լավագույն մրցարշավորդ է ճանաչվել Ռայան Հանթեր-Ռեյը, ով 2006 թ.-ից հետո առաջին ամերիկացին է, ով հաղթել է «Ինդիանապոլիսի 500 մղոն» մրցարշավում: «Լավագույն ակնթարթ» անվանակարգում հաղթել է Ջոն Բրուքսի վճռորոշ գոլը Ֆուտբոլի ԱԱ-ի շրջանակում Գանայի հավաքականի հետ ԱՄՆ-ի հավաքականի մեկնարկային խաղի ժամանակ (2:1):--0—
