ԵՐԵՎԱՆ, 24 փետրվարի. /Նովոստի–Արմենիա/. ՀՀ վարչապետ Տիգրան Սարգսյանը հիացել է Սոչիում կայացած Ձմեռային Օլիմպիական խաղերով` նշելով, որ դրանք անցել են համախմբվածության և ընկերասիրության մթնոլորտում։
«Դա մեծ տոն էր, և մենք հիացած էինք մեր տեսածով։ Հրաշալի մարզական միջոցառում էր, կար համախմբվածություն, նոր ոգի էր զգացվում, մթնոլորտն ամբողջովին այլ էր», – հայտարարել է Սարգսյանը ռուս գործընկեր Դմիտրի Մեդվեդևի հետ աշխատանքային հանդիպման ժամանակ, ով շնորհակալություն է հայտնել ՀՀ վարչապետին Սոչիի Օլիմպիադայի փակման արարողությանը մասնակցելու համար, հաղորդում է «ՌԻԱ Նովոստին»։
Հայ ժողովրդի անունից Սարգսյանը շնորհավորել է ՌԴ կառավարությանը այդ միջոցառումը հաջող անցկացնելու, ինչպես նաև մրցումներին Ռուսաստանի հավաքականի գրանցած հաջողության կապակցությամբ։ «Շնորհակալություն։ Դա, իհարկե, հաճելի է լսել», – նշել է Մեդվեդևը։
Ռուսաստանի հավաքականն ավարտել է Սոչիի Ձմեռային օլիմպիական խաղերը` թիմային հաշվարկում գրավելով առաջին տեղը։ Ռուսաստանի հավաքականը նվաճել է 33 մեդալ` 13 ոսկե, 11 արծաթե և 9 բրոնզե։–0–
