Ռուսաստանի հավաքականի ֆուտբոլիստ Շիրոկովը կարծում է, որ Հայաստանն արժանի է Եվրո-2012-ի ուղեգրին

Հայաստանի հավաքականի ֆուտբոլիստներն արժանի են մասնակցելու Եվրո-2012-ի եզրափակչին, կարծում է Ռուսաստանի հավաքականի կիսապաշտպան Ռոման Շիրոկովը:

Երեքշաբթի ընտրական B խմբի եզրափակիչ փուլում հայերն արտագնա խաղում ուժերը կչափեն երկրորդ տեղը զբաղեցրած Իռլանդիայի հավաքականի հետ, որից ընդամենը մեկ միավորով են հետ մնում: Եթե Հայաստանի հավաքականը կարողանա խմբում զբաղեցնել երկրորդ տեղը, ապա պատմության ընթացքում առաջին անգամ կպայքարի Եվրոպայի առաջնության եզրափակչին մասնակցելու իրավունքի համար:

«Խմբային ընտրական մրցաշարի արդյունքում երկրորդ տեղում կցանկանայի տեսնել Հայաստանի հավաքականին, քանի որ Ռոմա Բերեզովսկին իմ գործընկերն է եղել (Հայաստանի հավաքականի դարպասապահը, «Խիմկի» ակումբում Շիրոկովի նախկին գործընկերը), ինչպես նաև Հայաստանը նախկին խորհրդային հանրապետություն է: Ավելին, հայերն այս ընտրաշրջանում անցկացրեցին մի շարք հիանալի հանդիպումներ, ամենամեծ թվով գոլերն են խփել: Կարծում եմ, որ հայերն արժանի են խաղալու Եվրոյում», - ասել է Շիրոկովը լրագրողներին կիրակի «Լուժնիկիում» կայացած Ռուսաստանի հավաքականի մարզումներից հետո, հաղորդում է «ՌԻԱ Նովոստին»:

Նրա խոսքերով՝ ռուսական թիմում, որը երեքշաբթի ուժերը կչափի Անդորրայի հավաքականի հետ, հասկանում են, որ հարկավոր է խուսափել հեռացումներից և որակազրկումներից Եվրոպայի առաջնության եզրափակչի հանդիպումներից առաջ:

«Միշտ կարևոր է զերծ մնալ կարմիր քարտերից, հատկապես վերջին խաղում: Մենք դա ինքներս շատ լավ հասկանում ենք: Հեռացման դեպքում հնարավոր է ընդհանրապես չհայտնվենք Եվրո-ում», - հայտարարել է Շիրոկովը:

Խմբում առաջին տեղը զբաղեցնելու և Եվրո-2012-ի եզրափակչում հայտնվելու համար Դիկ Ադվոկատի թիմին բավական է ոչ-ոքի հաշիվ գրանցել Անդորրայի հավաքականի հետ խաղում, որը մինչև հիմա որևէ միավոր չի վաստակել: Ընդ որում, «Զենիթի» ֆուտբոլիստը չի կարծում, որ երեքշաբթի կարելի է դաշտ հանել թիմի նորեկներին և պահեստայիններին:

«Կարծում եմ, որ դաշտ դուրս կգան նույն ֆուտբոլիստները, ովքեր խաղացել են ողջ մրցաշրջանի ընթացքում: Ոչ ոք ինքնակամ չի զիջի իր տեղը հիմնական կազմում, իսկ նորեկներին փորձելու համար գոյություն ունեն ընկերական հանդիպումները: Այժմ հարկավոր է լուծել Եվրո-2012-ի եզրափակիչ դուրս գալու խնդիրը», - նշել է Շիրոկովը:-0-