Հայաստանի բռնցքամարտի ֆեդերացիան կտրականապես հերքում է Բաքվում անցկացվող աշխարհի առաջնության ժամանակ հայ բռնցքամարտիկների վրա հարձակվելու վերաբերյալ տեղեկությունը:
Մի քանի հայկական ԶԼՄ-ներ, հղում անելով ադրբեջանական կայքերին, նախօրեին տեղեկացրել էին, որ այսպես կոչված «Ղարաբաղի ազատագրման կազմակերպության» (ՂԱԿ) ակտիվիստները` ներխուժելով Հեյդար Ալիևի անվան մարզահամալիր, սկսել են քարեր նետել հայ մարզիկների ուղղությամբ, որից հետո բռնցքամարտիկներն իբրև հեռացել են դահլիճից:
«Ոչ մի նման բան չի եղել: Դա ապատեղեկատվություն է…Ես չեմ կարող ասել՝ ով է ապատեղեկատվության հեղինակը, բայց դա չի համապատասխանում իրականությանը», - «Նովոստի-Արմենիա» գործակալությանը հայտնեցին Բռնցքամարտի ֆեդերացիայի մամուլի ծառայությունից:
Գործակալության զրուցակիցը նաև տեղեկացրեց, որ Հայաստանի հավաքականի անվտանգությունն ապահովված է պատշաճ մակարդակով, և հայ բռնցքամարտիկների հետ ոչ մի միջադեպ չի եղել:
«Մեր պատվիրակությունը վրդովված է, որ նման տեղեկություն են փոխանցել մեր ԶԼՄ-ները: Նրանք զարմանում են, քանի որ ոչ մի նման բան չի եղել», - ընդգծեց գործակալության զրուցակիցը: -0-
