Հայ գրոսմայստեր Լևոն Արոնյանը Վեյկ-ան-Զեեում անցկացվող Corus Chess-2009 շախմատի գերմրցաշարի իններորդ փուլում կարողացել է սև խաղաքարերով հաղթանակ տանել ամերիկացի գրոսմայստեր Գաթա Կամսկու նկատմամբ, հաղորդում է մրցաշարի պաշտոնական կայքը։
Այս հաղթանակը թույլ է տվել նրան դուրս գալ առաջատար դիրքեր։
Արոնյանը, ով Վեյկ-ան-Զեեում դեռևս չի պարտվել ոչ մի հանդիպման ժամանակ, կիսում է առաջին տեղը Լենյեր Դոմինգեսի (Կուբա) և Սերգեյ Կարյակինի (Ուկրաինա) հետ։
Իններորդ փուլից հետո գրանցվել են հետևյալ արդյունքները՝ Կարյակին (Ուկրաինա) – Մովսեսյան (Սլովակիա) – 1։0, Կամսկի (ԱՄՆ) – Արոնյան (Հայաստան) – 0։1, Դոմինգես (Կուբա) – Ստելվագեն (Հոլանդիա) – 1։0։
Ոչ-ոքի են ավարտվել Լյուկ վան Վելի (Հոլանդիա) – Իվանչուկ (Ուկրաինա), Ադամս (Մեծ Բրիտանիա) – Կառլսեն (Նորվեգիա), Մորոզևիչ (Ռուսաստան) – Ռաջաբով (Ադրբեջան), Սմիթս (Հոլանդիա) – Վան Յուե (Չինաստան) հանդիպումները։
Վեյկ-ան-Զեի մրցաշարն աշխարհի հնագույն և հզորագույն շախմատային մրցաշարերից է, անցկացվում է ամեն տարի՝ սկսած 1937 թվականից։ Corus Chess մրցաշարն ավանդաբար անցնում է շրջանաձև համակարգով երեք խմբերում։
Մրցաշարում հաղթել են այնպիսի գրոսմայստերներ, ինչպիսիք են Մաքս Էյվեն (1940 թ., 1942 թ., 1952թ., 1958թ.), Սավելի Տարտակովերը (1949թ.), Գիդեոն Շթալբերգը (1956թ.)։
Մրցաշարը սկսեց ծաղկել 1960 թվականից, երբ դրան սկսեցին մասնակցել շախմատիստներ ԽՍՀՄ-ից (և հենց 1960-ին էլ առաջին տեղը Բենթ Լարսենի հետ կիսեց Տիգրան Պետրոսյանը)։ -0-
