Հայաստանը երաշխավորում է ադրբեջանցի շախմատիստների անվտանգությունը Երևանում կայանալիք պատանիների աշխարհի առաջնությունում

ԵՐԵՎԱՆ, 20 սեպտեմբերի./Նովոստի-Արմենիա/. Հայաստանը երաշխավորում է ադրբեջանցի շախմատիստների անվտանգությունը Երևանում հոկտեմբերի 2-17-ը կայանալիք պատանիների շախմատի առաջնությունում նրանց մասնակցության դեպքում։ Այս մասին հինգշաբթի կառավարական ճեպազրոյցում հայտնեց Հայաստանի երիտասարդության հարցերի և սպորտի նախարար Արմեն Գրիգորյանը։

«Հայաստանը երաշխավորում է ադրբեջանցի այն շախմատիստների անվտանգությունը, որոնք կմասնակցեն Երևանում կայանալիք շախմատի աշխարհի առաջնությանը»,-ասաց նա։

Գրիգորյանը հիշեցրեց, որ հայ ըմբիշներին անվտանգությունն ապահովվել է Բաքվում տեղի ունեցած աշխարհի առաջնությունում, և ադրբեջանական կողմը կատարել է Միջազգային օլիմպիական կոմիտեի բոլոր պահանջները։

«Ի պատասխան, մեր պետությունը ևս պատրաստ է իրականացնել ՄՕԿ-ի առջև իր պարտավորությունները, եթե ադրբեջանական թիմը ժամանի Երևան»,-ընգծեց նախարարը։

Համաշխարհային շախմատի ֆեդերացիայի որոշմամբ (ՖԻԴԵ) մինչև 20 տարեկան պատանիների շախմատի աշխարհի առաջնությունը Երևանում կանցկացվի հոկտեմբերի 2-17-ը։ Հայաստանի կառավարությունն արդեն հատկացրել է 12 մլն. դրամ Երևանում աշխարհի առաջնության կազմակերպման համար։--0—