Թրամփը նշել է Քանյե Ուեսթի առավելությունները Ջո Բայդենի նկատմամբ

ԵՐԵՎԱՆ, 12 հուլիսի․ /Նովոստի-Արմենիա/․ Ամերիկայի նախագահ Դոնալդ Թրամփը հայտնել է, որ ռեփ երգիչ Քանյե Ուեսթը, որը հայտարարել է Միացյալ Նահանգների նախագահ ընտրվելու իր ցանկության մասին, որևէ խնդիր չի ունենա առաջիկա ընտրություններում իր հիմնական մրցակից Ջո Բայդենից սևամորթ ամերիկացիների ձայները վերցնելու մեջ:

«Դա դժվար չի լինի [նրա համար]: Կոռումպացված Ջոն [Բայդենը] ոչ մի լավ բան չի արել սևամորթների համար»,- գրել է Թրամփը Twitter-յան իր էջում, հայտնում է РБК- ն :

Քանյե Ուեսթը ԱՄՆ նախագահի պաշտոնում առաջադրվելու իր պլանների մասին հայտարարել էր հուլիսի 5-ին: «Այժմ մենք պետք է իրականացնենք Ամերիկայի հույսերը՝ վստահելով Աստծուն, միավորելով մեր տեսլականը և կերտելով մեր ապագան», - գրել է նա Twitter-յան իր էջում, բայց միաժամանակ չի բացատրել, թե որ տարում է նա մտադիր մասնակցել քարոզարշավին: Այս տարի թեկնածուների գրանցումն արդեն ավարտվել է:

Դրանից առաջ Քանյե Ուեսթը բազմիցս խոսել էր ընտրություններին մասնակցելու իր մտադրության մասին, մասնավորապես, նա նման ծրագրերի մասին հայտարարել էր 2015 թվականին՝ MTV Video Music Awards մրցանակաբաշխության ընթացքում ունեցած ելույթի ժամանակ:

Եվս երեք տարի անց Չիկագոյի ռադիոկայանի եթերում ռեփերը ասել էր, որ դիտարկում է առաջադրվելու հնարավորությունը. «Այո: Դա 100% հնարավոր է: 2024 թվականին»:

Թրամփն, ի պատասխան Ուեսթի հայտարարության, ասել էր, որ նա ի վերջո կաջակցի հանրապետականներին: Սակայն ինքը ռեփերը, չնայած այն բանին, որ վերջին տարիներին Թրամփի կողմնակիցն է եղել, «Ֆորբս» -ին տված հարցազրույցում ասել է, որ այլևս չի աջակցում նախագահին և «հանում է իր կարմիր գլխարկը»:

«Ես կառաջադրվեի որպես հանրապետական, եթե Թրամփը չլիներ այդ կուսակցության մեջ: Քանի որ Թրամփը այնտեղ է, ես հանդես կգամ որպես անկախ թեկնածու»,- ասել է Ուեսթը: 

ԱՄՆ նախագահական ընտրությունները տեղի կունենան նոյեմբերի 3-ին: Դրանցում Թրամփի հիմնական հակառակորդը Դեմոկրատական ​​կուսակցության թեկնածուն և նախկին փոխնախագահ Ջո Բայդենն է: -0-