Լոնդոնի Kerry Taylor աճուրդի տունը երեքշաբթի Լոնդոնում կայացած աճուրդի ժամանակ 43,2 հազար ֆունտ ստեռլինգով վաճառել է բրիտանացի երգչուհի Էմի Ուայնհաուսի զգեստը, որով երգչուհին հանդես է եկել «Back to Black» ամենահաջողված ալբոմի շապիկին, զգեստի դիմաց վճարված գումարը գրեթե չորս անգամ գերազանցում է սկզբնական արժեքը, նշվում է աճուրդի տան տեղեկատվության մեջ, հաղորդում է ՌԻԱ Նովոստին:
Զգեստի նախնական գնահատականը կազմում էր 10-20 հազար ֆունտ ստեռլինգ: Այն գնել է Չիլիի նորաձևության թանգարանի հիմնադրամը:
2006թ.-ին Ուայնհաուսի ոճաբան Լուիզ Ուինվուդը դիմել է թայլանդցի դիզայներ Դիսայային (Disaya), ով Լոնդոնի Սընթ-Մարթի քոլեջի ուսանողուհի էր, խնդրելով զգեստ տրամադրել գովազդ նկարահանելու համար:
«Back to Black» ալբոմը Ուայնհաուսի երկրորդ ալբոմն էր: Սակայն երգչուհին դեռ այդքան էլ հայտնի չէր, այդ պատճառով շատ ոճաբաններ հրաժարվում էին համագործակցել նրա հետ: Դիսայան, ով այն ժամանակ Մեծ Բրիտանիայում զբաղվում էր հագուստի նոր շարքի ներկայացմամբ, ընդունեց առաջարկը՝ համարելով, որ իր երիտասարդական և համարձակ ոճը համապատասխանում է Ուայնհաուսին:
Ուինվուդը նկարահանումների համար մի քանի զգեստ ընտրեց, սակայն վերջում որոշվեց, որ ամենաշատը Ուայնհաուսին համապատասխանում է փոքրիկ, կրեմագույն շիֆոնե զգեստը՝ մանր, կարմիր գնդիկներով:
Գովազդի նկարահանումից հետո զգեստը վերադարձրեցին դիզայներին, և այս ընթացքում այն գտնվում էր Դիսայայի մոտ: Հուլիսին երգչուհու հանկարծակի մահից հետո Դիսայան որոշեց վաճառել այն: Ստացված միջոցները կփոխանցվեն Էմի Ուայնհաուսի հիմնադրամի հաշվին:
Իր ողջ կյանքի ընթացքում երգչուհին պայքարել է ալկոհոլի և թմրանյութերի կախվածության դեմ, մի քանի օր առաջ հրապարակվեց նրա մահվան եզրակացությունը, ըստ հետաքննության՝ երգչուհին մահացել է «հանգամանքների դժբախտ բերումով» և ալկոհոլի չարաշահման հետևանքով:
Ուայնհաուսի մահից հետո նրա ծնողները հայտարարել են հիմնադրամի ստեղծման մասին, որն օգնելու է երիտասարդներին կախվածության դեմ պայքարի և վերականգնման հարցում:-0-
