Պատերազմի հետևանքով տեղահանված արցախցիներին ՀՀ-ում ժամանակավոր աշխատանքի հնարավորություն կտրվի
![Պատերազմի հետևանքով տեղահանված արցախցիներին ՀՀ-ում ժամանակավոր աշխատանքի հնարավորություն կտրվի Պատերազմի հետևանքով տեղահանված արցախցիներին ՀՀ-ում ժամանակավոր աշխատանքի հնարավորություն կտրվի](/upload/iblock/c89/ztzypptm3e78t5fm8aky7d1ykf8eqf00.jpg)
ԵՐԵՎԱՆ, 17 դեկտեմբերի./Նովոստի-Արմենիա/. Կառավարությունը հաստատեց պատերազմի հետևանքով տեղահանված և փաստացի ՀՀ-ում գտնվող Արցախի գործազուրկ քաղաքացիների աշխատանքային փորձ ձեռք բերելու աջակցության միջոցառումը: Այս մասին որոշումն ընդունվել է հինգշաբթ՝ դեկտեմբերի 17-ին կայացած նիստի ժամանակ:
ՀՀ աշխատանքի և սոցիալական հարցերի նախարարության մամուլի ծառայության հաղորդմամբ՝
Շահառու է համարվում պատերազմական գործողությունների հետևանքով Ադրբեջանի վերահսկողության տակ անցած համայնքներում հաշվառված (ըստ ՀՀ կառավարության 2020 թ.-ի նոյեմբերի 21-ի N 1820-L որոշման) գործազուրկ հանդիսացող քաղաքացին։
Գործատու է համարվում այն իրավաբանական անձը կամ անհատ ձեռնարկատերը, որը շահառուի հետ կնքում է աշխատանքային պայմանագիր։
Գործազուրկ անձը մեկ անգամ կարող է ընդգրկվել միջոցառման մեջ` 3 ամիս տևողությամբ։
Միջոցառման շրջանակներում վճարվելու է`
● գործազուրկ անձին ամսական աշխատավարձ 100 հազ․ դրամի չափով,
● գործատուին գումար՝ գործազուրկ անձի աշխատավարձից հաշվարկվող հարկերի համար,
● գործատուի մոտ աշխատանքային փորձի ձեռքբերման գործընթացը կազմակերպող մասնագետին ամսական կտրվածքով վճարվում է գումար` 34 հազ․ դրամի չափով:
Նշվում է, որ միջոցառման շրջանակներում որպես աջակցություն տրամադրվող փոխհատուցման ենթակա միջոցները փոխանցվում են գործատուի բանկային հաշվին։-0-