ԵՐԵՎԱՆ, 21 հունիսի. /Նովոստի–Արմենիա/. Հայաստանի Ազգային ժողովն ուրբաթ արտահերթ նիստում առաջին ընթերցմամբ հավանություն տվեց «Հաշմանդամների սոցիալական պաշտպանության մասին» օրինագծի փոփոխություններին, որոնց համաձայն, առաջարկվում է ուսման վճարից ազատել այն ուսանողներին, ովքեր ուսման ընթացքում 3 կարգի հաշմանդամություն են ստացել։
«Գործող նորմերի համաձայն, դրական գնահատականներով քննություն հանձնած 1–ին և 2–րդ խմբի հաշմանդամները բուհ են ընդունվում և անվճար են սովորում։ Վճարովի հիմքերով սովորող ուսանողները, ովքեր ուսման ընթացքում ստանում են 1–ին կամ 2–րդ խմբի հաշմանդամություն, անցնում են անվճար ուսման»,– ասաց «Լուսավոր Հայաստան» խմբակցության պատգամավոր Սրբուհի Գրիգորյանն օրինագիծը ներկայացնելիս։
Նրա խոսքով, անվճար ուսման իրավունք ունեն նաև հաշմանդամություն ունեցող երեխաները` անկախ կարգից։
Միաժամանակ պատգամավորն ասաց, որ օրենքի գործողությունից դուրս են մնում ուսման ընթացքում 3–րդ կարգի հաշմանդամություն ստացած մարդիկ, և այս անարադարությունը վերացնելու համար առաջարկվում են վերոնշյալ օրենսդրական փոփոխությունները։
Գրիգորյանը նշեց, որ նախաձեռնությունը չվայելեց կառավարության օժանդակությունը, քանի որ գործադիր իշխանության մարմնում կարծում են, որ եթե անձն ընդունվելիս հնարավորություն է ունեցել վճարելու, ապա հետագայում էլ, 3–րդ կարգի հաշմանադամություն ստանալուց հետո, կարող է դա անել։
«Բայց պետք է հիշել, որ հաշմանդամություն ստացած մարդկանց մոտ տեղաշարժվելու խնդիրներ են առաջանում, ինչպես նաև ընտանիքում հավելյալ սոցիալական բեռ է առաջ գալիս։ Հետևաբար, կոչ եմ անում քվեարկել օրինագծի օգտին»,– ասաց նա։
Ինչպես քվեարկությունից առաջ ասաց «Իմ քայլը» խմբակցության ղեկավար Լիլիթ Մակունցը, առաջին ընթերցմամբ խմբակցությունը քվեարկում է առաջարկած փոփոխությունների օգտին, բայց վերապահումներով։
«Առաջինից երկրորդ ընթերցման ժամանակահատվածում մենք կստուգենք տվյալ որոշման ազդեցությունը բյուջեի վրա, քանի որ այս պահին նման հաշվարկներ չկան, և, ելնելով արդյունքներից, արդեն կարտահայտենք մեր վերջնական դիրքորոշումը»,– ասաց Մակունցը։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում
