Փաշինյանը` «Ռոսիա 1»–ի ուղիղ եթերում. Հայոց ցեղասպանության զոհերի հիշատակի օրը կարևոր է ողջ մարդկության համար (ՎԻԴԵՈ)
ԵՐԵՎԱՆ, 24 ապրիլի./Նովոստի–Արմենիա/. ՀՀ վարչապետ Նիկոլ Փաշինյանը «Ռոսիա 1» հեռուստաալիքի ուղիղ եթերում պատասխանել է «60 րոպե» ծրագրի հաղորդավարուհու հարցերին, որոնք վերաբերում էինք Հայոց ցեղասպանության զոհերի հիշատակի օրվան։
Աշխարհասփյուռ հայությունն այսօր` ապրիլի 24–ին, նշում է 1915թ.–ին Օսմանյան կայսրությունում կազմակերպված Հայոց ցեղասպանության 104–րդ տարելիցը։
«Այսօր 1915–1920թթ.–ին Օսմանյան կայսրությունում տեղի ունեցած Հայոց ցեղասպանության զոհերի հիշատակի օրն է։ Մեզ` հայերիս համար, այն կարևոր օր է։ Կարծում եմ, որ այն կարևոր օր է ողջ մարդկության համար։ Շատ կարևոր է Հայոց ցեղասպանության միջազգային ճանաչման գործընթացը, քանի որ այն շատ կարևոր քայլ է Երկրագնդի վրա բոլոր ապագա ցեղասպանությունների կանխարգելման համար», – ասել է Փաշինյանը։
Նա հիշեցրել է, որ Ռուսաստանի Պետդուման դեռևս 1995թ.–ին պաշտոնապես ընդունել է բանաձև Հայոց ցեղասպանության մասին` ընդգծելով, որ հայկական կողմը բարձր է գնահատում այդ քայլը։
Այժմյան Թուրքիան 104 տարի առաջվա իրադարձությունները ցեղասպանություն չի համարում և մինչև այսօր չի ճանաչում սեփական պատմության այդ ամոթալի էջը՝ մերժելով ինչպես հարյուր հազարավոր հայերին սրի քաշելու փաստը, այնպես էլ մերժելով դրա համար կրել բարոյական, պատմական և նյութական պատասխանատվություն։ 1965 թ.-ից սկսած, դեռևս Խորհրդային Հայաստանում, վերածնվել է Հայոց ցեղասպանության ճանաչման շարժումը, որին հետևեց ավելի քան տասնյակ պետությունների և միջազգային կազմակերպությունների կողմից այդ փաստի միջազգային ճանաչումը։
Հայոց ցեղասպանության փաստը ճանաչել են բազմաթիվ պետություններ։ Առաջինը ճանաչել է Ուրուգվայը 1965թ.–ին, որի օրինակին հետևել են մասնավորապես, Ռուսաստանը, Ֆրանսիան, Հոլանդիան, Բելգիան, Լեհաստանը, Լիտվան, Սլովակիան, Շվեդիան, Շվեյցարիան, Հունաստանը, Կիպրոսը, Լիբանանը, Կանադան, Վենեսուելան, Արգենտինան, Գերմանիան, Իտալիայի պատգամավորների պալատը, ԱՄՆ–ի 49 նահանգները (բացի Միսիսիպիից), Սիրիան, Լիբիայի ժամանակավոր կառավարությունը։ Հայոց ցեղասպանությունը ճանաչել են նաև Վատիկանը, Եվրոպական խորհրդարանը, Եկեղեցիների համաշխարհային խորհուրդը։–0–
